Durante un encuentro politico na San Nicolas recientemente, Minister Chris Romero a anuncia San Nicolas Ports Authority. E entidad nobo aki lo traha independiente di Aruba Ports Authority, cu awor ta resorta politicamente bou di Minister Dangui Oduber. Nan dos lo mester “competi” cu otro den prijs y cu e intencion pa e miho sobresali. Cu e intento aki, Gobierno lo boga pa kibra e monopolio di procesa carga di ASTEC na waf di Barcadera. E mandatario sinembargo no a indica si a haci un estudio di factibilidad, ken lo financia y no a indica pa ki tempo lo ehecuta e plan ambicioso aki.
Minister Chris Romero tabata hopi enfatico, cu San Nicolas Ports Authority lo maneha e Fast Ferry, proyecto di agricultura y pesca, lo maneha algun barco crucero pa Pariba di Brug y tambe lo desaroya un “containerhaven” estilo Barcadera.
Pa evita cu criticonan lo considera e plannan aki como un “hilaridad” of fantasia politico, e Minister a subraya cu tur e plannan aki ta den pleno ehecucion caba y cu e ta na mesa cu su colega Minister Dangui Oduber caba pa su ehecucion. Mas leu el a splica cu Minister Otmar Oduber di Infrastructura a otorga terenonan cu den pasado tabata wordo uza pa CITGO Aruba na e entidad. Ey lo desaroya e waf y asina logra un desaroyo pa San Nicolas.
Expertonan financiero ta considera e grito aki mescos cu un “promesa di campaña” pasobra maneho di dos waf caba ta un reto, referiendo na waf di crucero y un waf di carga. Pa traha un di tres waf pa un isla asina chikito, ta mas bien un deseo cu un realidad. Den bes di baha prijsnan e chens ta grandi cu tarifanan lo aumenta debi na gastonan halto di operacion.
Chris Romero tabata un docente di scol na San Nicolas y considera semper como un di e politiconan prometedo pa “pariba”. Sinembargo su carera politico y resultadonan ta papia un otro idioma. Den eleccion di aña 2005 el a drenta politica y a logra 314 voto riba su nomber y a drenta Parlamento. Den eleccion di aña 2009 el a crece den voto y a alcansa 622 voto, pues casi redobla su votonan. Asina Romero a drenta eleccion 2013 cu MEP den oposicion, a crece casi redoblando su votonan te na 1273 voto individual.
Pero, den e ultimo eleccion na aña 2017, ora cu tur hende den MEP a crece, net e candidato di San Nicolas a cay den voto, como un di e unico candidatonan cu a bay atras den voto! For di 1273 a bay na 1048 voto individual. Remarcabel ta cu Mike de Meza, otro candidato fuerte di San Nicolas tambe a bay atras den voto.
