Un situacion fo’i man den Caya Bohi, Mabon ora cu dos partido a dicidi di ‘hala otro cu sla’ caminda te hasta uzo di bat a tuma luga. Agresion y destruccion formal riba propiedad di otro.
Esaki a tuma luga algo pasa di 6:30 pm, ora polis a presenta cu urgencia na Mabon pa un pelea riba caya. Pa ta exacto den Caya Bohi, cu ta e casnan di pueblo den e area.
Segun por a compronde, mas tempran a surgi un of otro diferencia di opinion, cu a kere a caba eynan pero mas den atardi e discusion a reanuda y a bay completamente for di man.
Un pelea formal a start y dado momento, un di e partidonan a pasa man pa un bat y a causa destruccion na varios auto. Entre nan, un Kia blanco y un Toyota pick up color blanco. Mientras cu golpi tabata cay, a pidi mas polis pa presenta na e sitio pa duna un man cu e situacion.
Un rato despues, polis a logra domina e situacion. Tres persona a keda deteni, tur tres ta masculino. A transporta nan pa warda di polis. Mientrastanto dos vehiculo tambe a keda confisca. Cada un lo tin cu bay duna cuenta di kico a tuma luga y ken lo bay carga cu tur e gasto ocasiona.
