Polis y ambulance a mobilisa cu maximo urgencia pa Green Corridor ora cu a bati alarma pa un accidente serio cu varios auto envolvi. Na yegada a bin topa cu un scenario basta preocupante, caminda por a mira na un distancia un vehiculo cu basta daño, den e parti memey a topa cu tres vehiculo mas y aden dos hende herida.
Esaki a sosode den careda di 3:15 pm yegando Ser’i Teishi y mesora polis a duna instruccion pa cera e caretera di ambos banda pa por atende cu e accidente aki. Te caminda cu por a mira, tabata trata di 2 persona herida, chauffeur y pasahero di e Honda Fit (color ros) cu ta e vehiculo cu mas daño material riba dje.
Ambulance a cuminsa trata e victima mesora na yegada, a stabilisa cada victima y asina cuminsa prepara pa transporta ambos victima pa hospital. Un segundo ambulance a presenta pa asina brinda asistencia y yuda cu e transporte.
Na sitio a haya algun palabra di un di e chauffeurnan envolvi, cu a indica cu e tabata den e fila y cu trafico den velocidad minimo como cu tabatin hende trahando riba mantencion di caminda y diripiente a sinti e golpi di un otro vehiculo su tras.
Segun por a saca afo, e vehiculo den distancia, cu ta un Honda Pilot (cora kima) yegando e fila den trafico, no a midi velocidad ni tampoco locual tabata tumando luga su dilanti, a bay bal den un Honda Fit (color ros) cu basta forsa, a pone cu esaki a scual y bay dal tras di un Lincoln ( cora kima) y consecuentemente a bay dal den e Toyota Hilux pickup (color blanco) su dilanti.
