Mescos cu a haci dia 25 di maart, mañan diadomingo ta dia 25 di april y como tal, nos ta dos luna leu for di eleccion parlamentario, programa pa tuma luga diabierna dia 25 di juni 2021. Ta duna tur usuario un solo chens pa expresa, den forma di un encuesta, cu si eleccion ta awe, pa ken nan lo vota. Tambe tin e opcion den cual e usuario ta expresa di lo no vota pa ningun partido e eleccion aki y un otro mas cu ta bisa cu no sa ainda pa ken lo vota dia 25 di juni proximo.
Manera ta conoci, a programa eleccion pa dia 24 di september 2021, pero di forma inespera, Gabinete Wever-Croes a entrega su retiro dia 30 di maart ultimo, debi na un investigacion penal tumando luga den seno di partido POR pa posibel malversacion y falsificacion di documento pa cu fondonan di gobierno pa e fraccion den parlamento. Consecuentemente, a adelanta eleccion cu tres luna di tempo.
Partidonan awor ta den pleno preparacion pa bay eleccion. Te cu awor, nos ta conta 12 partido cu ta mustra di ta activo y cu interes pa bay eleccion na juni. Dia 7 di mei nan lo mester entrega lista na Conseho Electoral y un total di 8 partido lo mester conta cu firma di sosten pa por participa den eleccion. Lo duna algun dia pa yena lista. Na momento cu e partidonan ta definitivo, e ora campaña mes lo cuminsa den tur su forsa.
Tambe, despues di dia 7 di mei lo conoce e candidatonan cu lo aparece riba e listanan politico. Te cu diahuebs dia 6 di mei 2021 ainda por spera sorpesa, di sea candidatonan cu lo no participa mas of di otronan cu lo subi na ultimo momento. Ta mustra si, cu mirando e cantidad di partidonan cu lo participa, cu e eleccion aki lo tin mas candidato di cual votadonan lo por deposita nan voto riba nan nomber. E ta un reto si pa e partidonan politico pa logra haya candidato, specialmente debi na e tempo cortico cu tin pa campaña.
E encuesta di 24ora.com no ta pa saca delaster un opinion di e votadonan riba e politiconan ni tampoco riba e temanan cu mas ta preocupa nan. E ta pa por duna partidonan un idea cla di con nan ta para y con esey ta diferencia di luna pa luna. Otro luna dia 25 di mei lo tene un otro encuesta pa mira con, un luna prome, con e partidonan politico ta para pa eleccion. Por nota e ora si esun ta mas fuerte cu e luna prome of si a cay den acogida di un luna pa otro. Den e prome encuesta di dia 25 di maart, AVP a sali na prome luga, sigui pa MEP, despues e cantidad di hendenan cu lo no vota of no sa ainda pa kende lo vota y despues Raiz.
E encuesta ta start diadomingo pa 12:00 am y lo sigui te cu 12:00 am manece dialuna. Usuarionan ta haya no menos di 24 ora pa por participa den e encuesta y asina duna partidonan politico un bon idea di con nan ta para 2 luna leu di e fecha di eleccion.
