Presidente Edwina Werleman y vice-presidente Bobby Gibbs di Stichting MUSICA ta lamenta cu no a considera musiconan den e ultimo ahustacion di medidanan, siendo cu e fundacion tin mas cu tres luna wardando pa un contesta of sikiera un follow up di Crisis Team despues di a entrega un proposicion formal na nan. Na prome instancia Crisis Team a pidi Stichting Musica pa dialoga cu Departamento di Cultura [DCA] y a logra reuni varios biaha cu DCA. Stichting Musica a cumpli cu tur peticion di DCA y riba dia 20 di januari 2021 a presenta un Proposal Plan cu diferente sugerencia di parti di e musiconan.
Te awe Stichting MUSICA no a ricibi un contesta riba e plan aki, supuestamente pa motibo di hopi trabao y casonan variante, e team te ainda no a logra discuti/repasa e proposicion. Den esaki ya tres luna a pasa y a ahusta varios medida, pero sin cambio algun pa musiconan y e mundo di entretenimento.
Musiconan ta dunando di nan parti pa cumpli cu e protocolnan stipula y ta hasta motivando otro pa vacuna. Stichting MUSICA ta compronde cu Crisis Team tin un tarea dificil y cu no por bay bek na ‘normal’ di biaha. Sinembargo, mester cuminsa un caminda!
Durante di e conferencia, musico Sergio Barros a trece algun topico interesante padilanti. Entre otro, cu dunando musiconan e espacio pa gana un entrada, a lo largo lo yuda e caha di gobierno, mirando cu nan no lo depende mas riba FASE. Tambe a remarca cu dialogo y union entre musico ta e unico moda pa yega na solucion y cu ora di traha maneho no mester solamente enfoca riba solucion inmediato, pero tambe pensa riba un plan pa termino largo.
Stichting MUSICA ta haci un apelacion urgente na Crisis Team pa tuma accion y pa follow up riba e Proposal Plan cu a entrega na januari 2021. E meta no ta pa pone comunidad na riesgo, pero si pa yega na un solucion realistico. Stichting MUSICA lo duna oportunidad na mas musico pa vocifera nan preocupacion y comparti nan situacion actual cu comunidad di Aruba, pa medio di mas programa ‘Live’ riba nan plataforma di Facebook den e siman cu ta sigui.
Stichting MUSICA ta pidi tur musico y tur esunnan cu tin e mundo di musica y entretenimento na pecho, pa subi e pagina di Facebook di Stichting MUSICA y uza e frame disponibel. Cambia bo profile picture uzando e frame aki pa mustra solidaridad cu e musiconan y e causa aki y manda un mensaha cla y raspa pa Gabinete Wever-Croes pa trata e punto aki como prioridad. E meta primordial di Stichting MUSICA ta pa haya oido di Crisis Team y hunto tuma accion pa yega na solucion responsabel.
