E ta den libertad pero ta core e riesgo di bay KIA bek. Ministerio Publico ta haya e acusacion contra dje proba pa cual a pidi un castigo di dos aña incondicional.
John de Haseth, entre otro miembro di Grupo 7, tabata den corte compaña pa su abogado mr. John Zara pa defende su mes di e acusacion di abuso sexual cometi aña pasa den luna di april. E victima ta un mucha homber hoben.
E ta nenga tur acusacion, incluso e parti cu ta bisa cu el a droga e mucha homber pa probecha di dje. Ta papia di un producto cu ta haci e victima bira indefenso contra atake sexual.
Aunke cu e ta nenga tur cos, e hoben victima a duna un descripcion completo di e parti paden di e apartamento y cu ora Polisnan a bay den e luga, a constata cu tur cos ta cuadra.
De Haseth mes ta bisa cu e ta inocente y mas bien el a bira victima di e mucha homber aki cu a horta su cartera. Sinembargo ningun polis kier tuma e keho di robo aki contra dje.
E mucha homber si tabata na su apartamento pero no a drenta paden. “Mi no ta laga niun hende drenta den mi cas,” el a bisa hues. Solamente el a busca e hoben pa haci algun trabou y nada mas.
Su abogado mr. Zara no ta haya cu tin prueba suficiente, pasobra ta palabra di un contra e otro. El a cuestiona con a tarda pa e investiga e caso y e echo cu no kier a tuma declaracion di su cliente.
Fiscal a pidi un castigo di dos aña. Hues lo anuncia su decision dia 12 di october awo.
Pa un relato mas amplio, lesa TREMPAN.
