Entrante 27, 28 y 29 di januari, e tienda Raw Modern cu ta situa na L.G. Smith Blvd 388, lo tin su blowout sale bendiendo tur su productonan na descuentonan increibel pa recauda fondo pa Fundashon Stimami Sterilisami su campaña nacional di sterilisacion. Lo tin, entre otro, decoracion di cas y cushina, paña pa beach, tas, pechi y acesorio pa cacho y pushi y hopi mas. E sale aki ta wordo subsidia door di Spazio Realty y 100% di e fondonan recauda durante e sale lo ta duna como donacion na Fundashon Stimami Sterilisami y Bucuti & Tara Beach Resort lo match esaki florin pa florin.
“Como un persona cu ta stima cacho y pushi, e ta hopi doloroso pa wak e cantidad di animal cu ta bandona riba caya, sufri di hamber, malesa of ta wordo mata den kill cage. P’esey nos kier aporta na un organisacion cu ta haci un impacto directo y duradero pa mitiga e crecemento di e poblacion di cacho y pushi riba caya. Nos a scoge Fundacion Stimami Sterilisami door di cu nan tin hopi aña ta yuda comunidad y fundacionnan cu ta cuida bestia di caya door di subsidia e costo di sterilisacion,” Neny Henriquez, doño di Spazio Realty ta conta.
“E directiva completo di Stimami Sterilisami ta sumamente agradecido y masha conmovi door di e gesto generoso aki di Neny Henriquez y ta yama henter Aruba pa bishita e tienda entre 9am pa 6pm dia 27, 28 y 29 di Januari pa disfruta di e descuentonan increibel y yuda recauda fondo pa Stimami Sterilisami su campaña nacional di sterilisacion di cacho y pushi,” Ewald Biemans, Presidente di Fundashon Stimami Sterilisami, ta conta. “Tambe nos ta invita henter comunidad pa registra boso mascotanan riba nos website www.stimamisterilisami.com pa haci uzo di nos subsidio y prijs special riba e costo di sterilisacion.”
Pakico sterilisa bo mascota
Aruba ta sufri di un problema di cantidad grandi di cacho y pushi cu ta biba riba caya sin hogar adecua. Aunke e organisacionnan di boluntario cu ta cuida cacho y pushi di caya ta haciendo un tremendo trabou pa purba yuda e animalnan aki, sin sterilisacion e problema nunca lo ta resolvi. Cacho y pushi ta reproduci exponencialmente, y manera un bira loops riba caya, e ciclo di abandono, hamber y malesa ta continua (manera por mira den e tabel abou).
Globalmente expertonan ta di acuerdo cu e solucion pa e problema di animalnan riba caya ta sterilisacion nacional masivo. Na Hulanda, esaki den combinacion cu e aplicacion di e leynan, a resolve e problema. P’esey sterilisacion ta e mayor enfoke di Fundashon Stimami Sterilisami y e fundacion ta subsidia parti di e costo di e procedura pa henter comunidad y otro fundacion nan.
Adicionalmente, sterilisa un mascota ta importante pa su salud y tin varios beneficio, como por ehempel:
– E mascota ta bira mas resistente na hopi tipo di malesa
– E mascota por tin un bida mas largo
– E mascota ta bira mas leal
– E ta evita bo mascota di haya puppies no desea
– Bo ta directamente yuda disminui/mitiga e poblacion di bestia riba caya den e forma mas efectivo y compasiona (e otro alternativa lo ta manda nan Kill Cage)
Fundashon Stimami Sterilisami
Fundashon Stimami Sterilisami ta un non-profit organization cu ta uza 100% di tur donacion ricibi pa ofrece subsidio pa e procedura di sterilisacion pa tanto publico en general, como tambe organisacionnan di boluntario cu ta cuida bestianan di cas of riba caya. E organisacion su bukinan ta habri y ta wordo controla pa asina brinda transparencia total di e uzo di fondonan. Pa esunnan cu kier aporta na e gran causa aki, por haci un donacion directo na Fundashon Stimami Sterilisami, cuenta: Aruba Bank 6012630190.
