Ta for di algun dia caba, habitantenan di Colony ta yamando Polis pa interveni den un situacion peligroso cu nan ta bibando aden dia aden y dia afo. Doño di e cas Sero Colorado # 1579 tin tres cacho di raza American Bulldog, cu ta masha brabo mes y ta ataca y terorisa e bario completo. Pa colmo, e habitante mes no ta biba eynan mas.
E cachonan ta pa nan cuenta y atardi e doño ta pasa duna nan cuminda y ta sigui. Cachonan ta logra los y sali afo, strobando e trankilidad den e bario. Polis a presenta algun biaha caba e ultimo dianan aki pero sin por a soluciona e temor di e bisiñanan.
Awe diadomingo pa mas pa menos 8:40am a manda patruyanan atrobe pa e mes area. Habitantenan mester bay traha pero no por sali for di cas pa subi auto mientas otronan cu a yega den auto no por baha pa drenta cas pasobra cachonan ta hasta morde riba nan bumper di auto.
Varios patruya a yega na e sitio y despues di deliberacion, a opta pa pone e cachonan drumi. Sinembargo, despues di a tira e prome cacho, e dos otronan a sali na careda y huy. Nan ta keto bay den e bario di Sero Colorado. Polis a core busca nan den vecindario pero sin mucho resultado.
Di acuerdo cu e ley nobo di cacho, doño di e bestia ta responsabel pa tene nan cacho den cura y no ta permiti pa cachonan brabo asina ta riba caya y ta ataca otro hende riba caminda publico.
