E presidente di Venezuela, Nicolas Maduro, a responsabilisa e mandatario di Colombia, Juan Manuel Santos, di ta tras di un “atentado” den su contra cu a sosode diasabra ultimo na Caracas.
“Ta trata di un atentado pa matami, nan a purba di matami,” Maduro a bisa, kende a acusa e “ultraderecha” di Venezuela y di Colombia, manera Santos, como e responsabelnan “detras di e atentado aki.”
“Mi no tin duda. Ta e “saña asesina” di e oligarkia Colombiano. Mi ta sigur cu tur e pruebanan lo aparece. Pero e prome elementonan di investigacion ta apunta na Bogota,” el a señala.
E gobierno Venezolano a denuncia cu e presidente Maduro tabata victima di un “atentado” na momento cu e tabata encabesa un acto militar na Caracas diasabra atardi.
E mandatario a resulta ileso, mientras cu otro shete persona a resulta herida, despues cu a registra varios explosion cerca di e podium unda cu e tabata dunando un discurso, segun gobierno Venezolano.
Como respuesta na e señalamento di Maduro, e gobierno Colombiano a cualifica esaki como “absurdo” y “falta di tur fundamento.”
“Ya ta custumber cu e mandatario Venezolano culpa Colombia permanentemente di cualkier tipo di situacin. Nos ta exigi respet pa e presidente Juan Manuel santos, pa e gobierno y pa henter e pueblo di Colombia,” e Canciyeria Colombiano a bisa den un comunicado.
“Esaki no tin base. E presidente ta dedica na bautismo di su nieta Celeste y no na tuma gobiernonan stranhero,” e Alto Consehero Presidencial di Comunicacion di e gobierno Colombiano, Camilo Granada, a bisa den un mensahe manda na e coresponsalnan stranhero den e pais.
Maduro a denuncia multiple intento di atentado contra su bida den pasado, pero no a acusa directamente un presidente manera ta den e caso aki.
“Ya e prome investigacionnan a tindica cu varios di e responsabelnan intelectual, financistanan di e atentado contra mi bida, ta biba na Merca, na Florida,” e mandatario Venezolano a sigura.
Mey mey di e polemica aki, unp oco conoci grupo di oposicion autodenomina Movimiento Nacional Soldados de Franelas a aparece na atribui na e atake atrabes di su cuenta di Twitter, crea na Maart di 2014.
“E tempo a yega y a avisa Nicolas Maduro cu e tin fecha di vencimento,” nan a adverti via e via aki, despues di a publica algun video di e incidente tuma for di otro rednan social.
“E operacion tabata manda dos drone carga cu C4, e obhetivo e tribuna presidencial, francotiradornan di guardia di honor a manda abao e dronenan prome cu nan a yega e obhetivo.
Nos a demostra cu nan ta vulnerabel, awe e no a logra, pero ta cuestion di tempo,” nan a sigura despues, den un otro mensahe.
E grupo, sin embargo, no a ofrece prueba cerca di su vinculacion cu un comunicado difundi atrabes di e rednan social yama “Operacion Fenix.” Y pa aumenta e confusion, e agencia di noticia AP a sigura cu algun bombero presente na e escena a sigura un tanki di gas di un apartamento cercano, tabata e causante di e explosion di diasabra ultimo.
Ainda tin hopi pregunta sin contesta den esaki, e ultimo giro di e Venezuela surealista.
Presidente Maduro y su hendenan hopi biaha ta acusa e oposicion, Colombia of Merca di purba di sabotea su gobierno.
Mescos cu aña pasa, cu e atake riba Corte Suprema cu Nicolas Maduro a yama un atake “terorista,” e teorianan conspirativo ta abunda den esaki y ya ta distribuyendo diferente version di e eventonan di diasabra.
Den un pais unda ta dificil opera como periodista y unda cu no ta respeta e libertad di expresion, pa e berdad yega, ta dificil.
Loke hopi hende tin miedo ta cu e gobierno ta uza e incidente aki pa hustifica un ofensiva contra cualkier oponente politico.
E version di e dronenan cu explosivo, den cualkier caso, ta loke e gobierno Venezolano tambe ta maneha.
“A scucha detonacion di artefactonan bulado di tipo drone, varios cu tabata contene un carga explosivo, y detona cerca di e tarima y den e zonanan di e desfile,” e minister di informacion, Jorge Rodriguez a sigura.
Segun e vocero oficial, e incidente a tuma luga pa 5’or y 41 ora logal di diasabra.
Shete persona a sufri herida pa e diverso detonacionnan cu a sosode durante e evento di e di 81 aniversario di Guardia Nacional Bolivariana (GNB) cu Maduro ta encabesa.
Den su mensahe di anochi di diasabra, Maduro a declara un “maximo alerta” pa forsanan arma y di inteligencia na frontera di Venezuela cu Colombia.
“Ya e investigacionnan ta hopi avansa. A cuminsa cu e investigacionnan di inmediato. Parti di e autornan material a wordo gara y ta den proceso,” Maduro a bisa sin detaya e identidad di e detenidonan.