Aruba y mundo completo ta den un situacion di pandemia desde comienso di 2020. En conexion cu e situacion di Covid-19, dokternan di cas na Aruba tin un servicio adicional pa comunidad. A introduci e servicio aki un aña pasa. Prome cu e pandemia y tambe awor den e situacion di Covid-19, dokternan di cas tin un rol importante como e prome punto di contacto pa pashentnan.
Basa riba e hecho cu un hende por tin sintomanan pisa door di e virus y/of mester ayudo agudo si e tin Covid-19, dokternan di cas a dicidi pa amplia nan servicio pafo di oranan di trabou. E servicio adicional aki ta wordo brinda di 7:00 pm te cu 7:00 am den siman y henter dia den weekend y ta unicamente pa pashentnan di Covid-19, diagnostica cu e virus, y/of pa un caso di emergencia unda un pashent tin sintoma severo di Covid-19. E pashentnan aki por yama e number 166.
Si un pashent ta positivo pa COVID-19, su dokter di cas ta tuma contacto cu ne via telefon pa haci un evaluacion di e pashent. Aki e dokter ta dicidi si e pashent mester haya un meter pa midi su oxigeno. Ta instrui e pashent con pa uza esaki y e momento cu e bira un situacion alarmante pa e yama dokter di cas, durante ora di trabao of e spoedlijn of e number 166 si ta den siman entre 7:00 pm y 7:00 am of den weekend.
E dokter di cas cu ta atende e yamadanan ta evalua e situacion di e pashent na telefon, uzando hopi biaha informacion di e meter di oxigeno. Dokter ta dicidi si mester plania un bishita pa por evalua e caso personalmente of pashent por warda te e dia siguiente pa por haya bishita di su mesun dokter di cas. Si un bishita personal ta necesario, e dokter por consulta cu coleganan specialista na hospital si e pashent mester wordo interna of no.
Pa haci e bishita na e pashent, dokternan di cas ta haci uzo di Rode Kruis pa yuda e dokter bisti su paña di proteccion pa no contagia cu e virus. Rode Kruis ta encarga tambe cu e logistica ora di bishita un pashent y ta aporta riba diferente otro tereno manera suministro di oxigeno of den caso cu mester aplica CPR riba un pashent. E dokternan di cas ta contento cu e colaboracion durante nan servicio adicional en conexion cu Covid-19 y ta gradici Rode Kruis pa esaki.
Si un pashent tin cualkier pregunta of necesidad pa ayudo medico cu por atende durante orarionan normal di oficina di dokter dus cu no ta cay den e categorianan anteriomente menciona, e pashent por tuma contacto cu nan dokter libremente durante oranan di oficina di dokter.
