Un grupo grandi di docentenan na Colegio Arubano, lo start nan aña escolar 2018-2019 cu mal pia. Esaki despues cu directiva di scol, cu sosten di e directiva di SMOA, a dicidi pa nombra un Conrector sin pasa e procedura regular y transparente. Manera ta conoci, recientemente a promove un Conrector pa bira Rector, pa cual a haci un solicitud habri pa reemplas’e. A scoge un docente pa bira Conrector. Pero, asina vakantie e cuminsa a bira conoci cu un otro Conrector a tuma su retiro pa bay bira Director di SKOA, cu a habri un otro luga. Docentenan a pensa cu e procedura normal lo habri atrobe debi cu e docente lo cuminsa traha na SKOA te dia 1 di november 2018. Pa nan sorpresa nan a compronde cu entretanto a opta pa, den ausencia di e Rector nobo, pa core nombra un otro docente den e funcion di Conrector, sin pasa e procedura habri y transparente di reclutacion.
Algun docente a hasta manda carta pa e Rector nobo y pa SMOA, pa informa cu nan ta malcontento cu e forma aki di procede, sin cu nan tin nada contra di e docente en cuestion, pero si cu e forma con directiva di scol ta atende cu su docentenan.
Un otro punto di agenda tambe ta e nombracion di un “Manager Bedrijfsvoering”, sin pidi permiso prome di Minister. E persona aki ta gana un salario halto, compara cu esun di Rector mes. No a tene un proceso di reclutacion transparente den esaki tampoco.
Algun decision tuma recientemente tambe tin e docentenan preocupa, manera ta cambio diripiente di e compania cu ta huur mashinnan di saca copia.
Awe diaranson lo tin un reunion entre docentenan di Colegio Arubano y directiva di scol pa cual e punto aki ta halto riba nan lista di prioridad. Algun a indica cu si no sali cu un decision satisfactorio, lo dicidi despues di e reunion mes kico lo ta nan siguiente pasonan.
