Diamars tabata tin e apertura di aña escolar 2018-2019 na Universidad di Aruba y Tim Croes, decano di e facultad di arte y ciencia a splica cu tin mas cu 225 studiante nobo cu a bin na e facilidad. No tabata tin les, sino un introduccion, Meeting and Greet with the Faculty.
Tur hende por a conoce otro y tambe pasa un rato ameno.
Diaranson, ta sigui cu e programa. Lo bay tin tres dia di actividad. Dia 2 tey caminda cu e studiantenan lo bay den centro, y haci un wega hunto cu e docentenan.
Riba e di tres dia, nan ta bay na nan otro edificio y eynan nan lo bay reuni riba beach.
Tin hopi inscripcion e aña aki. Aña pasa e cantidad tabata 187 studiante cu a inscribi. Ainda e inscripcion ta andando.
Keynote speaker
Miss Mundo, Nurianne Arias Helder tabata tey presente durante di e prome dia di introduccion na Universidad di Aruba. Nurianne mes ta un alumni. El a gradua como bachelor of Arts, Organization Governance and management y e tabata un orador durante di e dia di introduccion.
E tema general di e dianan di introduccion di Universidad pa e studiantenan nobo ta UA Vibes. Nurainne, hunto cu un colega Felicia Ponson, lo conta con nan a pasa nan añanan na Universidad di Aruba, con el a cambia nan, con el a forma nan, etc. E mes lo enfoca riba e parti di ta un persona vibrante, un persona dinamico y kico ta hacibo un persona vibrante, no solamente den e comunidad di Universidad, pero tambe pa cu otro. Kisas globalmente manera e ta den su papel como Miss Mundo actualmente.
Miss Mundo
Na momento cu el a bay pa Miss Aruba 2018, e proposito y e meta tabata y deseo, en particular, tabata pa representa Aruba na Miss Mundo. Semper e tabata tin amor y pasion pa yuda otro, vooral den proyectonan social y caritativo. Hopi hende a mir’e crece den e mundo aki desde cu e tabata tin 12 aña di edad te cu awo, y no a compronde cu e por a caba un masters na Hulanda y participa na Miss Aruba.
Na Universidad di Aruba, en especial, el a crece como persona, el a participa hopi aña den clubnan caritativo. Na Universidad di Aruba, hunto cu Circle K UA y for di eynan a cera conoci cu ken e ta como persona y e a siña di con e ta, den un forma vibrante. Un persona cu cualkier obstaculo cu el a surpasa den Universidad, a haci’e crece y e ta trece e mensahe aki na e studiantenan nobo.
