E motibo ainda ta desconoci pero recherchenan ta investigando e caso aki, pa por haya contesta riba tur e preguntanan riba con el a cay. Hecho ta cu e homber Luis Angel Figueroa Flores, naci na Venezuela di 20 aña di edad, a cay fo’i tres piso di e parkinglot di Paseo Herencia Mall y a fayece despues na Hospital. E tabata masha conoci entre e clubnan den vecindario como DJ Louisville.
Tabata pa 10:49 pm cu dokter den Cuido Intensivo na Hospital a constata morto di e victima. Dokternan a purba haci mas cu nan por den e circunstancia cu a trece e victima hospital, pero e sla nan ricibi, entre otro na cabes, a conduci na hopi reto pa salud di e hoben.
E caso a tuma luga mas of menos 7:00 pm n’e parkeerplaats di Paseo Herencia Mall na Noord. Polis a yega y a topa e victima den un estado basta critico benta na suela. Ambulance a yega mesora na e sitio. Paramediconan a stabilis’e pa despues transport’e pa Hospital. Ey a constata cu su situacion tabata preocupante y a opta pa intern’e mesora den e unidad di Cuido Intensivo (ICU).
Na e sitio, por lo menos un testigo a conta cu a scucha un zonido fuerte y a bin topa cu e hoben tira na suela. E no tabata na tino pero si tabata halando rosea. Tambe a compronde cu e hoben, di apenas binti aña cu identificacion local, a sufri un lesion hopi pisa na cabes.
Polis a bin topa algun pertenencia personal di e hoben aki kibra y tira na vloer, na e di dos piso. Tambe a haya informacion cu e vehiculo di e hoben tabata riba e mesun piso y p’esey a cera e area ey tambe.
Parce cu e hoben ta traha como un Diskjockey (DJ) y tabata masha popular y stima entre su amigonan. Pa nan henter e asunto aki ta masha duro y mas bien ta un berdadero misterio, pasobra no por a nota nada pasando cu ne.
Investigacion policial awo lo mester inclui e camaranan di e shopping mall pa sigui tur movecion di e victima, mira si e tabata su so of cu otro hende. Y con el a haci cay for di ariba, si ta e mes a tira su curpa of si un otro hende a bent’e.
Condolencia y hopi forsa na su famia den e momento dificil aki.
