Awe a tuma luga un reunion entre Minister Glenbert Croes, encarga cu maneho di energia di nos isla, hunto cu Ton Rojer di Utilities Aruba N.V., Alfredo Koolman di W.E.B. Aruba N.V., Anthony Irausquin di N.V. ELMAR. Mirando e “setting” di e reunion, por conclui cu ta Ton Rojer di Utilities ta dirigi e reunion, cu porcierto a tuma luga na oficina di Utilities Aruba N.V. tambe, den cual e minister y WEB ta sinta cara cara cu N.V. ELMAR pa atende e asunto di reduccion di tarifa.
Gobierno ta bou di presion pisa di parti di gremio sindical y comercial cu ta boga pa un reunion urgente relaciona cu reduccion di e prijsnan di utilidad. Tempo cu Minister Glenbert Croes a introduci e tarifanan nobo, cu oposicion ta cataloga como un “medida”, el a priminti cu ta temporal y cu asina e prijsnan baha, cu automaticamente e prijsnan lo baha tambe. Pero, no obstante cu e prijsnan a baha di algun siman caba, pueblo ainda no ta sinti nada y WEB y ELMAR a opta pa deliberadamente, cu permiso di Utilities Aruba N.V., pa keda sin reduci prijs!
Experto y conocedo di e materia y ta cerca di e companianan di utilidad, a sigura cu reduccion di prijs no ta un asunto facil. Ta premira cu e prijsnan lo no baha pa awo y sigur no na e mesun nivel di casi 30% cu a subie ultimo. Por corda cu dia 29 di juli 2022, Gabinete Wever-Croes II a anuncia aumento di prijs di coriente, cu casi 23.9%, cu sin duda tabata un aumento drastico. E aumento tabata vigente pa cas y negoshi mesun cos. Tarifa di awa tambe a subi cu un averahe di mas o menos di 27.77% pa uzo domestico parti den diferente bracket.
Pa gremio comercial, specialmente hotelnan cu ta esunnan cu ta uza mas, e aumento aki a haci un impacto masha grandi riba nan gastonan di operacion. Y mirando cu Minister Glenbert Croes a subie di un dia pa otro, no a duna hotelnan chens pa adapta nan tarifanan. Y como cu a priminti cu lo ta temporal, a pensa cu ta pa algun luna so, pero ocho luna a bay caba, sin tin ningun indicacion ki ora e lo baha y pa cuanto.
Sindicatonan, den representacion di e clase trahado, tambe ta insisti cu tarifa di utilidad ta pisa hopi riba e presupuesto familiar. Door di yega aument’e asina, sin cu salario a subi, ta pone cu e clase trahado ta hay’e den un deficit tur luna. OPPA, cu ta representa e pensionadonan, ta sigura cu e situacion cu nan ta hasta pio. Esunnan hoben ainda por haci un “side job” pa purba tene cabes riba awa, pero nos grandinan hopi biaha curpa no ta duna pa por sigui traha mas. Nan entrada ta limita y ta fiho tur luna, pues no tin espacio pa e tipo di aumentonan di sorpresa asina. Specialmente e tarifa halto di coriente a dal nan masha duro!
Mientras di un banda gremio ta boga pa reduccion y pa normalisa e tarifanan, awor ta resulta cu e companianan tambe ta bou di presion di banco y e agencianan cu a fia nan placa, pa mantene nan entrada y reservanan stabiel, di acuerdo cu locual a acorda ora di a fia placa di nan. Nan ta preocupa cu, ora prijs di heavy fuel oil a subi, mester a adapta e tarifanan mesora. Pero, ora cu e director di WEB a haci esaki, e mesun Minister Glenbert Croes a rabia y a fluit e bek, ordenando pa no aumenta nada y cu e no a duna permiso pa haci tal. E tempo ey WEB a informa Parlamento di Aruba cu nan ta coriendo caba den cora y cu e decision aki di Gabinete Wever-Croes II, ta hinca e compania den mas problema financiero.
Pues, si analisa e situacion bon, e prijs di awa y coriente halto cu nos ta paga awe na Aruba no ta pasobra e gastonan di produccion ta halto, sino cu pueblo mester paga awo pa decisionnan politico robes tuma algun luna pasa. Di cierto forma, pueblo tin cu paga un medida pa yena e cuentanan di WEB y ELMAR atrobe siendo cu nan mes a permiti pa laga e cuentanan bira bashi, basta nan por a cumpli cu e programa politico di e dos partidonan na mando. E ora kisas mester evalua, e mesun gremionan aki, pa entama un caso civil contra e tres directornan aki y pone nan personalmente responsabel pa e decisionnan cu nan a tuma, na desventaha di e compania y di henter pueblo.
E asunto aki ta demostra un biaha mas, cu ora politica mete den companianan priva di gobierno, casi semper e resultado ta devastador pa pueblo. Si e asunto aki resulta den un caso den corte, e lo bira e di dos reto huridico cu Minister Glenbert Croes ta confronta den su carera, pa e mesun motibo y na e mesun compania, esta WEB. Ta door di esaki a crea Utilities Aruba N.V., pa sirbi como un defensa pa proteha e companianan di utilidad for di politica, pero obviamente e sapato ey ta keda Ton Rojer hopi grandi y awe su maneho ‘slap’ ta bisto pa henter nos pueblo!
