E trahadonan di Arubus NV hunto cu nan sindicato SEPPA a reuni urgentemente den ora di mainta, pa motibo cu un biaha mas gerencia a cancela reunion cu mediador. Despues gerencia di e semi compania estatal a aclaria e puntonan cu sindicato a trece padilanti.
Edwin Mohammed, director di Arubus NV, a expresa cu no ta nan custumber pa duna reaccion den media, pero e kier a aclaracion di mainta unda cu a pone trabou plat pa dos ora pa cierto malcontento di e trahadonan. E sindicato a bisa cu cada biaha director di Arubus NV ta pospone reunion, pa esaki e director mes a bisa cu esey ta mita di berdad. Tin momento cu ta pospone reunion, pero ta manda tur cos pa mediador y SEPPA.
E ultimo dos biaha nan cu a cancela reunion, esun di dia 15 di juni tabata posponi door cu tabatin un otro reunion mainta y merdia cu Raad tambe. Gerencia a informa nan di esaki. A propone pa sinta bek dia 22 di juni, esta awe, pero pa motibo personal a cancela esaki di cual e director kiermen di informa mediador. A propone fecha di dia 6 di juli pa nan sinta cu otro. “No ta asina cu cada biaha e reunion ta wordo posponi, posponi,” el a expresa durante rueda di prensa. Na momento cu pospone un reunion, ta duna motibo valido y tambe tur informacion.
Mohammed a expresa cu e parti cu no ta duna e cosnan di salaris tabel, esey ta nan kier. Arubus a encamina un proceso bastante largo pa asina por a yega na loke ta bira un salaris tabel nobo. El a reitera cu dia 11 di maart gerencia a duna nan un carta, splicando hopi duidelijk di e pasonan tuma y kico nan ta wardando riba dje.
Mientras no tin acordering di parti Raad, gerencia no por saca informacion di e structura di salario cu tin. Nan a ricibi tur cos, di e herarkia nobo cu kier introduci, nan a ricibi e functie omschrijving cu nunca nan tabatin, functiewaardering tambe nan a haya cu nunca tabatin. E parti di structura di salario ta e unico cos cu nan no a ricibi ainda, segun e director.
Na final di e rueda di prensa Mohammed a expresa cu esaki no tabata un reaccion, pero mas bien un aclaracion di kico ta andando.
Pa mas lesa TREMPAN.COM.
