Tabata dia 25 di februari aña pasa cu a detene Jason Margarita, bao sospecho di a tene relacion sexual cu un mucha muhe menor di edad. Mainta tempran di e fecha ya caba menciona, recherche hunto cu Jeugd- en Zeden Politie a detene Jason Margarita na su cas. Na momento di su detencion e tabatin 39 aña di edad.
Margarita tabata consehero di partido POR, di ex-minister Otmar Oduber, despues di ex-minister Andin Bikker, di DIMAS, di radioemisora POWER FM y ta doño di e gym Perfect Me. Nada no ta riba su nomber, debi na su pasado scur, pa cual tur negoshi y contract ta riba nomber di su casa, e social media queen Julisa Rodulfo, conoci como “Julie Julie”.
Margarita tin un gym den cual e ta atende clientenan femenino so. Ta yuda nan pa baha peso y tene nan curpa den condicion, mara na un dieet streng y un formula di come y biba mas saludabel. E ta uza su casa na radio y riba red social pa promove e proyecto aki. E tin varios storia di exito, den cual berdad e hende muhenan a baha hopi peso.
Memey di e trabounan di duna les di fitness, el a recluta un mucha muhe menor di edad pa tuma les. Na caminda, e mucha muhe a hasta bira instructor den e gym su mes, dedica na otro hobennan di entre 12 pa 16 aña. Tur cos ta mustra e tempo ey cu supuestamente Jason Margarita tabatin un relacion amoroso cu ne. Den esaki, a bin compronde cu Margarita a huur cas of apartament pa e mucha muhe cu ta biba den cas cu welo y wela.
KEHO PA PEDOFILIA
Parce cu tata di e mucha muhe a descubri mensahenan di bos, di whatsapp, potret y video cu Jason y e mucha tabata manda pa otro. Eyden, segun e mayor, tin suficiente evidencia cu e relacion entre nan dos no tabata di entrenado, sino di pareha. E mucha muhe e tempo ey tabata bou di 16 aña, cu ta haci Jason Margarita un sospechoso di abuso sexual cu menor.
PETICION DI FISCAL
Dia 8 di october 2021, e caso di Margarita a bin dilanti den corte caminda fiscal a pidi 42 luna di prizon p’e, di cual 6 luna ta condicional y 2 aña di prueba. Jason Margarita lo mester sinta 3 aña kitando e luna nan cu e tabatin cera caba.
JASON CULPABEL
Algun siman despues di e peticion di Fiscal, corte di Aruba a trata e caso di e conocido fotografo Jason Margarita caminda ta acus’e di a tene relacion sexual y comete acto di inmoralidad cu un menor di edad, esta un persona di menos cu 15 aña di edad.
CASTIGO
Margarita a haya dos aña y seis luna (30 luna di prizon) di cual seis luna ta condicional, pues locual e mester a sinta ta dos aña. Su abogado defensor mr. Zuhaila Arendsz-Marchena a bisa e tempo ey cu esaki mester haci cu pueblo mester ta mas consciente di nos leynan. A pesar cu hues a dicta cu Margarita no a comete ningun tipo di abuso, e actonan cu el a comete ta ilegal den cuadro cu e ta un mayor di edad cu a tene relacion cu un menor di edad.
Tambe hues a conclui cu e acusado mester sigui un programa pa evita cu e bolbe haci tipo di acto di tal indole den futuro, a pesar cu e raport psicologico a conclui cu Margarita no tin tendencia di pedofilia.
LIBER ATROBE
Jason Margarita a recobra su libertad dialuna dia 20 di juni 2022. Su libertad ta basa cu di 24 luna di castigo, kitando un tercera parti di bon conducta, e mester a sinta solamente 16 luna cu a cuminsa di februari 2021 ora cu a detene y a yega 16 luna e siman aki. Pa dos aña e no por hay’e den problema cu husticia pa loke ta pedofilia, sino e mester bay cera bek y sinta e lunanan condicional. Tambe e ta obliga na sigui bou guia di Reclassering pa evita cu e ta cay atrobe den mal caminda. Pa comunidad, mester tin wowo habri contra hombernan asina cu tin debilidad pa mucha, pasobra si nan no haya ayudo profesional, e chens pa nan cay atrobe ta grandi.
