For di Minister mr. Geoffrey Wever, nos a compronde cu ta pensa di bin cu incentiva fiscal pa inversionista of desaroyado pa haci Centro di Ciudad (Caya Grandi) mas atractivo. Den pasado, tabatin un areglo similar den area di San Nicolas pero a kita esaki.
Nos a puntra directora di Departamento di Impuesto, mr. Luenne Gomez-Pieters, con leu ta cu e plan pa introduci algo asina den Oranjestad awor. Corsou tin esaki implementa pa hopi tempo caba y su centro di ciudad ta ‘booming’ contrario na esun di Aruba.
E director di DIMP a referi na nos un documento cu ministerio di minister Wever a traha riba dje pa un tempo caba. Nan tabata bezig cu reformanan fiscal, BBO bij invoer, aworaki a bira momento oportuno pa mira kico t’e espacio financiero segun Gomez-Pieters ta splica. “Incentivanan fiscal semper ta costa placa. Nos lo tin cu benchmark esaki tambe riba terenonan internacional.” Incentivanan fiscal discriminatorio ta hunga un rol. Un compania cu ta estableci na Oranjestad por ehempel of den sector hotelero, ta cuestiona pa kico no ta haya un korting den Grondbelasting mientras cu si tin compania na San Nicolas si. Ariba terenonan internacional, ta yama esaki Ring Fencing, ora bo tin un boxeo y tur dos ta den un cancha den e caso aki protehando eigenlijk e comerciante cu ta estableci na San Nicolas y un otro tin cu paga un suma mas halto di Grondbelasting por ehempel.
Pa motibo cu leynan no mag ta discriminatorio, mester a bay bek un rato y mira con esaki ta contra palabracionnan internacional. E reto ta con pa stimula actividad economico dunando incentivonan fiscal cu ta cumpli cu cuadronan internacional. Ta sigur cu lo bini cu un solucion segun Gomez-Pieters pasobra nos a pasa den cosnan hopi mas grandi pa loke ta diferente reformanan. “Esey ta bira e reto, cu no ta imposibel pasobra nos ta kere sigur cu tur area den nos Isla mester un desaroyo, un empuhe. Centro di Ciudad ta un hot item caba pa basta tempo, dus lo mester kibra cabes un rato cu profesionalnan pa wak kico ta un pakete cu nos lo por presenta na minister Wever y nos minister tambe pa wak si e ta algo cu ta traha pa nan.”
Na Corsou por ehempel tin e Tax Holiday cual Aruba a kita a base di presion internacional cu a haya na 2003. “Nos ta bisa cu no ta tur ora e islanan ta trata mesun husto pasobra nos mester a kit’e, Corsou por ta ainda tin su Tax Holiday.” Corsou tambe ta haya analisis di e mesun organisacionnan internacional cu nos. Delaster tempo por corda con Aruba tabata riba un lista pa motibo di no cumpli cu cierto rekesito, y ta hopi trabao duro mester a traha tras di cortina pa bin na drecha cierto ley pa convence organisacionnan internacional cu no tin nada straño pasando den nos leynan fiscal.
“Lo nos kier bay riba un lista, y Corsou ta riba lista ainda, Aruba no ta riba ningun mas dus nos kier manten’e asina.” E director ta subraya cu internacionalmente ora bo ta riba un lista asina e tambe tin su efectonan pa cu tratadonan y actividadnan economico cu otro paisnan, nan ta wak di biaha kico ta bo status.
DIMP ta bisa cu si tin cosnan pa bay pitch, semper ta haci esaki conhuntamente cu mesun instancianan internacional aki – dus si DIMP bin c’un idea nan ta benchmark esaki tambe como algo aceptabel, pa uza como empuhe pa stimula actividad economico
