Stichting HUNTO ta dedica su di tercer forum anual n’e diferente formanan di adiccion, cu atencion special pa vaping, screening time, e peligernan di social media y bullying online. E actividad di awe mainta ta reuni e profesionalnan di e veld y docente, mientras diabierna 13 di november e organisacion lo dedica un segundo encuentro na studiantenan di diferente scol.
Directora di Stichting HUNTO, Dalgis Montalvo, a splica cu e forum ta forma parti di e trabou anual di e organisacion, basa riba e dato- y casonan cu nan ta colecta durante aña. A base di e problematicanan cu mas ta bin dilanti, e aña aki nan a dicidi pa enfoca riba adiccion y e desafionan cu ta afecta comunidad.
Entre e temanan cu e forum ta trata tin vaping, screening time, e impacto di social media y bullying riba rednan social. Diferente speaker ta comparti nan conocemento, uzando tambe dato local pa duna e profesionalnan un miho comprension di e situacion na Aruba.
Montalvo a indica cu Stichting HUNTO ta considera importante trece e informacion aki mas cerca di e comunidad, pasobra por tin mas hende cu ta enfrenta e problematicanan aki cu no necesariamente ta reconoce nan señalnan.
Segun Montalvo, e casonan cu ta yega cerca di e organisacion ta yuda identifica cua topico ta necesidad mas atencion. E meta ta duna docente y otro profesional den e veld e conocemento necesario pa reconoce señal di alerta y identifica ora un mucha of hoben ta pasando den un situacion di riesgo.
Forum ta registra demanda grandi
Montalvo a calcula cu e actividad ta atrae alrededor di 300 participante cada aña. E ta indica cu e forum ta yena trempan, algo cu segun dje ta mustra e necesidad cu tin den e veld pa mas informacion y orientacion riba e temanan aki.
E encuentro tabata dirigi na adulto, specialmente docente y profesionalnan cu ta traha cu hoben. Pa diabierna, Stichting HUNTO a prepara un actividad na Gloria, cu participacion di tres scol y casi 300 mucha.
Durante e segundo actividad, banda di e presentacionnan profesional, lo tin tambe testimonio di personanan cu a pasa den diferente situacion di adiccion. Entre otro, un persona cu a enfrenta problema di uzo di substancia y un hoben cu tabata den un gang lo comparti su experiencia y con el a logra sali for di e ambiente ey.
Montalvo a indica cu e testimonio personalnan ta yuda duna e actividad un caracter mas real y conecta e temanan cu e situacion cultural y social di Aruba.
Specialista ta comparti investigacion y conocemento local
Pa e forum, Stichting HUNTO a invita diferente profesional cu conocemento specialisa den e temanan cu ta trata. Montalvo a splica cu e organisacion ta busca persona cu por comparti nan experiencia y conocemento, incluyendo profesionalnan cu a ricibi capacitacion den e areanan aki.
Durante e forum di awe, un specialista den pulmon lo duna un presentacion mas profundo tocante vaping y e efectonan cu e por tin riba curpa humano.
Tambe un profesional di enfermeria di Jeugdgezondheidszorg (JGZ) lo presenta resultado y observacionnan di un investigacion cu e ta realisando tocante screening time bou di mucha. Montalvo a gradici docente, profesionalnan, hobennan y tur esnan cu durante e tres añanan pasa a participa den e forumnan di Stichting HUNTO.
Ademas, e a expresa su gradicimento na Dienst Volksgezondheid (DVG) pa e colaboracion y sosten pa por realisa e dos actividadnan di e aña aki.
