“Ami si ta hay’e positivo…No hay mal que por bien no venga. E cos ‘ki mester ta andando basta tempo caba”, asina Diego de Cuba, presidente di Sindicato di Trahadonan di Aruba (STA) a contesta nos ora a puntr’e su reaccion riba benta di e propiedad. Gerencia a inform’e di e benta, pero no a suministra mucho informacion ni detaye ainda.
Locual si De Cuba sa ta cu Iberostar a cumpra e hotel “met lusten en lasten” y como tal tur trahado a pasa den e benta. Te ainda no a menciona nada di plan, ni vision y pio con Iberostar tin pensa di maneha e hotel. Cu si e lo ta un hotel regular of un “all-inclusive” tampoco e sindicalista no por a contesta.
STA ta e unico sindicato cu ta representa e mas o menos 65 empleadonan cu ta traha eynan. El a sigura di lo vigila e proceso di traspaso aki di masha cerca pa garantisa cu ta respeta derecho di tur trahado. Te awo no tin motibo pa ta preocupa, segun Diego de Cuba, pasobra ta doñonan a cambia, pero operacion ta sigui estilo “business as usual”.
Biento Spaño
Recientemente a anuncia cu Tiera del Sol Real Estate N.V y Tierra del Sol Golf Course N.V. a comparti cu nan tin doño nobo. Iberostar Group N.V. a adkiri e propiedad di tanto Tierra del Sol Real Estate N.V. como Tierra del Sol Golf Course N.V.
Iberostar Group N.V. ta un compania turistico cu un compromiso pa un turismo responsabel, cu enfoke den cuido di su hendenan y di medio ambiente. E compania tin mas di shen propiedad di cuater y cinco strea ubica den diferente destinacion popular den Europa, Africa y Merca. Alabes a informa e propietario- y miembronan cu proximamente lo tin un di dos comunicacion caminda lo confirma fecha y ora pa reunion pa tur propietario di cas conhuntamente cu e doño nobo y e persona encarga cu maneho.
Vision di Raymond Maduro
Sun Development a construi y habri Tierra del Sol na aña 1992. Tabata un proyecto di Raymond Maduro, cu e tempo ey tabata unico y innovado. Tabata e prome cancha di golf di 18 buraco pa nos isla, atraendo un mercado elite cu ta biaha pa pasa vakantie solamente na destinacionnan cu tin un golf-course. A combina e cancha cu un proyecto di propiedad, restaurant, piscina y mas. A bende e compania cu varios grupo pero e ultimo tabata di un grupo, cu e comerciante local Maarten van Romondt como e cara local. Na varios ocacion e compania a hera bay bancarota y tabata necesario pa bin inversion di afo.
Plannan tabata existi caba
Iberostar tabata planea pa traha un hotel y casino den banda, riba tereno di Tierra den Sol mes. Nan lo traha dos hotel mas na Eagle Beach, un unda antes tabata POVA Club y e otro net na otro banda di e mesun tereno, riba Sasakiweg, unda tabatin e waterpark cu a bay bancarota. Pero door di e incertidumbre den maneho di Tierra den Sol, a opta pa cumpra henter e compania mes. Fuentenan yega na e negosacion a bisa cu mas bien a “cut the losses”.
Tocante STA
A funda Sindicato di Trahadonan di Aruba (STA) na aña 1964. E tempo ey como “Gouvernements Arbeiders Bond Aruba” pues GABA y cu tempo a cambia pa STA. E presidente actual ta Diego de Cuba, cu a tuma timon di e sindicato over na aña 2009 ora nan tabatin solamente dos compania afilia. Despues di 14 aña, awe e sindicato ta conta cu hopi compania afilia y cu un lista largo di miembro, haciendo nan un di e sindicatonan di mas grandi di Aruba. Nan ta representa un cantidad di miembro den sector priva, den gobierno y hasta den companianan priva di gobierno.
Tocante Tierra del Sol
Por topa e proyecto di clase halto na 2 kilometer leu di Arashi y na 14 kilometer leu di Aeropuerto Internacional Reina Beatrix. E ta conta cu un tereno di 243 hectar. E condominionan elegante di 2 pa 3 camber ta conta cu flat screen tv, Wi-Fi gratis, washer y dryer. Algun di nan tin terasa cu dak, balcon y/of un bunita bista pa lama of e campo di golf. E villa di 2 pa 4 camber tin pool priva. E casnan traha a base di peticion tin area pa barbecue. Parkeerplaat ta gratis, mescos cu e servicio di transport di aeropuerto y lama. Tin un restaurant y un bar. Algun otro comodidad cu e ta conta cu ne ta gym, un pool den e area afo, tennis court, un spa, un golf course di 18 buraco y un espacio pa train.
Tocante Iberostar
Iberostar Group ta un compania turistico global como tambe grupo hotelero. E compania tin cuater area di haci negoshi: E division di hotel, club di vacacion yama The Club, turismo di yegada y di salida bou marca (brand) di biahe Almundo.com, World 2 Meet y Iberoservice y negoshi di propiedad.
E compania su trademark ta ‘first line’ hotels, cu ta nifica directamente na beach y rondona cu hardin. Funda na 1956 na Palma, Spaña cu aproximadamente 28 mil trahado.
Propietario di Iberostar Group ta e biyonario Spaño, Miguel Fluxa Rossello, di tres generacion di heredero di negoshi di sapateria. E oficina central di Iberostar ta situa na Mallorca, Spaña. Hotel cu ta resorta bou di nan cadena ta localisa na Europa, Norte America, Latino America y Africa.
