STA tabata tey presente durante di e strike di dos ora di e trahadonan di ASTEC. Diego de Cuba, presidente di e sindicato a comenta cu nan ta representa e mayoria di e trahadonan. Awe e grupo cu tin di UPA tambe a uni na e causa aki y ta hopi bon cu nan a join’e tambe.

A manda un carta caminda cu for di basta dia caba pa bin cu un accion.

Awor aki tin hende trahando riba crane cu no ta certifica. Akinan ASTEC ta cometiendo un blunder atrobe. No por pone hende cu no ta certifica trahando riba crane, pa por pusha e trabao. No por wanta e accion di dos ora. Pero e miyonesnan cu ta drenta si ta dushi. E trahadonan tin di haya un aumento chiripero y nan tin cu keda biba lekker. Nan no kier negosha un CAO nobo, pero si kier dicta. E buchi di e trahadonan a yena y no por continua.

Tin un contracto firma entre ASTEC y APA NV y e sindicato kier mira contenido di e contracto aki. E ta cortando na tur dos banda. E ta cordando den e trahadonan di ASTEC y tambe den e trahadonan di APA.

A manda un carta na minister siman pasa, tempran, pidiendo un reunion di caracter di urgencia riba e problematica di e contracto cu tin firma entre ASTEC y APA, cual ta un contracto caminda cu a duna ASTEC e beneficio pa opera e waf di Barcadera.

Ningun hende no a gana e bidding eynan. E gobierno anterior ya a instrui APA NV pa modifica su exigencianan di tal modo, cu ASTEC por a gana e bidding. Ata e trahadonan awe ta haya un aumento chiripero. Sindicato STA tin cu para bringa pa nan y nan ta dispuesto pa haci esakia. Esaki ta un di e accionnan cu nan lo bay tene, dos ora di accion di 3’or pa 5’or di atardi. Si tin cu bay intensifica e accionnan, lo haci esey tambe. Si nan kier ta hiba nan corte, si nan kier ta hiba nan unda cu nan kier. Pero sindicato kier claridad den e contracto cu tin entre APA y ASTEC. Awor aki ASTEC tin cu bin sinta na mesa bek cu STA pa continua cu e negociacion di CAO. Cuenta di verleng un CAO, ciendo cu e sindicato a gana e referendum. Riba su mes, ASTEC ta para tur negociacion y ta dicidi pa alarga e contracto colectivo y e sindicato tin cu keda para mey mey. Cos no ta bay asina aki, segun de Cuba.

Mediador ta na altura di e situacion como tambe e abogadonan ta na altura di e situacion. De Cuba a menciona cu akinan e sindicato STA ta sali pa su miembronan y pa e clase trahado en general. E cuestiona ki, ta un cuestion bastante serio, pasobra a bisa, cu e wega aki tin cu stop. A bin Barcadera, nan ta ganando boshi placa y e trahadonan ta esunnan cu ta den desbentahe di tur e situacion aki y no por. Awe segun de Cuba, un accion di dos ora, ta na su luga, pa demostra berdaderamente cu e cos aki ta serio. Tanten cu keda sinta, keda keto, nada no ta pasa. Carta ta bay, carta ta bin, negociacion ta bay y bin, tur cos ta keda status quo.

Awor aki a pone un accion, pa haya sa e berdad cu tin hinca den e contracto aki, pasobra e contracto aki ta poniendo e trahadonan sangra, di tur dos banda, tanto ASTEC como APA. Gerencia mes ta biba lekker y e sindicato kier mira e contracto.

Welganan den pasado

Tabata tin cierto protesta of welganan den pasado, caminda cu mayoria a bin afo. Asina mes e no a stroba e trabaonan na waf. Esey a pone cu e forsa dado momento a kibra. Mester a acepta cu awe no tin un contracto colectivo firma. Gerencia ta haci loke kisas ta preocupante pa e trahadornan. De Cuba a comenta cu esey ta pone cu gerencia ta haci y deshaci. Locual cu nan a strike p’e e biaha aki, berdad nan a bay corte, aunke cu e sindicto a conseha nan pa no haci’e, pasobra a mira cu nan ta bay perde caso. E punto cu nan lo bay bringa, nan lo a perde caso. Pavia di esey, gerencia ta kere cu e tin poder asina grandi riba e trahadonan, e ta kiboca. E forsa di e trahadonan ta cerca nan. Ta nan field. Gerencia ta pone hende cu no tin cualificacion, cu no ta certifica traha riba e gruanan. Si algo pasa, ken por tin culpa. Awor aki e compania di seguro tin cu bin y yopnan cu un boet. E cosnan aki ta inaceptabel locual cu ta wordo haci.
Gerencia no por soporta un accion di dos ora, pero si ta duna e trahadonan un aumento chiripero di 30, 40 of 50 florin. Tin cu duna e trahadonan un aumento rasonabel cu nan por biba di dje. E sueldo minimo mes ta bay subi cu 100 florin. E trabao aki ta uno responsabel. Cualkier cos bay fout, ta daño material grandi lo tin. Duna nan un aumento cu nan por biba cun’e. Pero no manera cos ta bay aki. E trahadonan tin para casi 6 aña caba den e situacion akinan. No por continua asina aki. Mester bin un cambio y uno radical, de Cuba a expresa.

Esaki ta e comienso y mediador ta na altura di e situacion. Awor aki, wardando e resultado di e accion aki, ta bay mira kico nan reaccion lo ta. Nan ta informa di e accion aki. Nan no por bisa cu STA no a informa nan. A informa nan debidamente. UPA y su hendenan tambe lo a informa nan debidamente, pasobra a bisa cu e cos aki tin cu cera cabes un rato, pa pone e cos aki plat. Pasobra no kier cu STA ta bay pone un accion y e trahadonan cu ta afilia ainda cu UPA ta bay traha paden y ta stroba e accion.

A pone e cos aki na serio. A cera cabes, pone e accion aki, pa mira ki rumbo lo coy. Asina aki no por continua. Esaki ta bay ta un ehempel tambe pa tur e otro sindicatonan aki na Aruba. Pa ora yega e momento cu tin di cera cabes, pa bo logra un meta, bo tin cu haci’e y bo tin cu bay p’e tambe. No papia so, sino haci’e tambe. A mira un grupo di sindicato a forma basta tempo pasa y nan a yama nan mes un bloke, y te awe nada no a sosode y tur hende sa esey.