Kòrsou ta haña training di sistema nobo internashonal

Dianan 19 i 20 di febrüari último e Organisashon Mundial di Meteorologia, WMO, a duna un asina yamá CAP Jump-start training aki na Kòrsou. Riba petishon di Servisio Meteorológiko di Kòrsou e organisashon a aseptá pa pone nos pais komo parti di nan skèdjel speshal pa trese e training menshoná.

CAP ta para pa Common Alerting Protocol i e ta un sistema protokolario
internashonal pa alertá un pais riba fenómenonan di naturalesa manera wer ekstremo, orkan, laman brutu, tsunami i temblor. Tambe e sistema ta konsentrá riba fenómenonan ku por forma un menasa pa seguridat di siudadanonan manera por ehempel eskape di gas, kandela grandi etc. CAP ta diseñá pa tur medio di komunikashon i tambe diferente medionan digital ku ta konektá ku internet. E sistema aki ta kreá di tal manera ku den un forma simultaneo e alerta ta bai na tur outoridat konserní.

Meta prinsipal di e jump-start training aki ta pa duna e instanshanan ku tin e outoridat pa saka alerta, konseho i asistensia pa implementá e sistema. Di e forma aki nan ta bira parti di e tim internashonal ku ta move den e direkshon di  sistemanan pa komuniká den un forma digital ora tin peliger di fenómeno natural of ku ta peligrá e seguridat di un sosiedat. Outoridatnan na Kòrsou manera Meteo, Tim di Kalamidat (Rampenstaf), Directie Risicobeheersing en Rampenbeleid i Bureau Telecommunications, Post and Utilities (BTP&U) ku ta embolbí den e parti di avisá i alertá komunidat den kaso di tipo di fenómenonan asin’aki, a partisipá na e training. E training a tuma lugá na
Departamentu di Servisio Meteorológiko na Mahuma.