E tabata un dokter masha stima den e pueblo di Noord y tabata conoce su pashentnan a base di nan nomber. El a traha como dokter di cas pa 49 aña largo, pero na aña 2008 el a retira, pero asina mes como pensionado e tabata reemplasa otro dokternan di cas ora tabatin mester. Ayera diasabra atardi laat a drenta e tristo noticia cu Dr. Lin a bay sosega. E tabatin algun tempo caba ta lucha cu e salud.
Teodosio Ho King Lin a nace dia 14 di april 1938 y a fayece ayera dia 7 di augustus 2021. El a bay net despues di su casa, esta defunto Gladys Lin-Kock. El a bay laga su yiunan y nietonan atras awo, cu sin duda lo haya su falta masha.
Teodosio Lin a gradua na aña 1966 fo’i Universidad di Nijmegen, na Hulanda. Dia 1 di juli 1966 el a cuminsa traha den departamento di medicina como trahado di Salud Publico, mientras cu un aña despues el a eherce e funcion di director interino di Departamento di Salud Publico na Aruba. Dr. Lin a bay traha dia 1 du april 1968 den e practica di servicio di gobierno cu permiso special di practica priva.
E tabata brinda su servicio medico como dokter di cas pa e districto di Noord, cual consultorio tabata situa net dilanti ex-Rio Grande Store, unda awe tin MFA Noord. Durante su 49 aña como dokter, el a brinda cuido na no menos di 3500 pashent. Despues cu el a retira como dokter, ainda el a keda atende yamadanan di 911 pa bay accidentenan di trafico of na cas di hende, ora di constata morto.
Dr. Lin a specialisa su mes den diferente medicina entre otro “integrative”, medicina alternativo y complementario, medicina energia, medicina di Chines tradicional, medicina “Arjuvedic”, medicina herbal, terapia hipnotico y spiritual. Tambe el a atende diferente curso, lectura y seminario entre otro “rational hypnotherapy”, prome congreso mundial di S.T.D., prome congreso di medicina alternativo na Guatemala, “risk profile for cardiovascular diseases” na Aruba, nutricion den practica general y hopi mas.
Separa di dokter, e tabata co-fundado di partido Movimiento Electoral di Pueblo (MEP) dia 9 di Februari 1971. El a participa tambe riba lista di MEP activamente como politico durante nan prome campaña na aña 1973. E no a milita pa mucho aña pero semper a keda cu un bos critico, hasta contra su mesun partido si ta necesario. E semper ta boga pa perfeccion y teniendo e pashent central, manera a custuma den su añanan como dokter.
Awe hopi ta haya su falta, pasobra nan ta e tipo di dokternan di cas cu tabata sinta pa un bon rato pa atende cu pashentnan un pa un. Nan ta di e tempo prome cu AZV, tempo di PPK Kaart y seguro priva. Nan ta di e generacion den cual dokter conoce henter famia y separa di brinda cuido, hopi biaha ta conseha pashentnan riba varios otro tema, casi un semi psicologo tambe. Ainda despues di baha cu pensioen, ainda e ta corda su pashentnan y ta cuminda nan na nomber y fam ora topa cu nan riba caya.
Cu Dr. Lin sosega na paz. Na su famia….boso tata a bay sosega y a laga n bunita legado atras.
