Aruba Airport Authority N.V. (AAA), e compania cu ta maneha y opera Aeropuerto Internacional Reina Beatrix (AUA Airport) ta contento pa anuncia cu TUI Fly Belgium lo reanuda servicio temporal semanal entre Brussel, Belgica (BRU) y Aruba (AUA). Esaki cuminsando desde diadomingo awo, dia 3 di april 2022 te cu 23 di october 2022.
TUI Fly Belgium lo opera su avion boeing 787-800, cu capacidad di 300 asiento, for di Brussel via Republica Dominicana pa Aruba. Nan lo ofrece buelonan semanal riba diadomingo, cu ta sali for di BRU pa 9:00 am y ta yega AUA pa 3:05 pm, cu un tempo di biahe estima di 12 ora y 45 minuut. TUI Fly ta un marca di TUI Airlines Belgium y ta forma parti di e TUI Group, e grupo turistico mas grandi na mundo, cu su oficina principal situa na Hanover, Alemania.
“Esaki ta un noticia fantastico, mirando cu e servicio aki lo trece aproximadamente 4,050 pasahero for di Belgica pa Aruba via Republica Dominicana. Nos ta contento cu TUI Fly Belgium ta mira e potencial den nos destinacion y cu nan a anuncia cu nan lo reanuda servicio temporal pa Aruba. Nos ta ansioso pa e servicio adicional den futuro, pero mientrastanto nos lo ta felizmente wardando pa yama bonbini na e pasaheronan na Aruba,” asina CEO di Aruba Airport Authority, Joost Meijs, a bisa despues cu e mes a ricibi e grato noticia.
