Tin un disputa entre ASTEC y sindicato STA. Pa esaki mediador di gobierno ta envolvi. Segun Anselmo Pontilius, e partidonan den e caso aki, a negosha entre September te fin di November.
Nan a yega hopi cerca riba e parti di duracion y e parti financiero. Pero na final no a firma un acuerdo. No a haya otro riba e partinan final. Fin di Februari a haya un peticion di parti di Sindicato STA pa media entre partidonan y for di 3 di Maart ta cu e partidonan na mesa. Finalmente siman pasa, ora cu a constata cu e partidonan no por haya otro, mediador di Gobierno a propone y a pone riba papel un proposicion den cual entre otro ta papia di un contracto colectivo di 4 aña di duracion. E por ta menos, pero en todo caso a keda den e direccion eynan entre otro. A recomenda diferente punto cu nan por supera e parti financiero.
Apart di esey tin discusion riba trahamento di overtime, cual tin su caracter legal cun’e. Pero a conseha nan tambe pa supera esaki, cu algun texto cu ta hopi cla, tanto pa e dunado di trabao, pa e trahadonan.
E partidonan mester a reuni diamars. Of continua na reuni den presencia di mediador di gobierno. E compania a pidi mas tempo pa profundisa cu accionistanan riba e proposicion di mediador di gobierno. Diabierna awo ta spera di por tin e acuerdo en principio di cual e partidonan lo mester caba di aproba.
Con leu
Semper e parti financiero ta keda un discusion serio. Loke bo pidi, bo ta haya tur ora. E proposicion cu a pidi pa reparti esaki, no solamente den e parti di aumento di salario, sino tambe riba beneficionan secundario. Nan lo por supera esaki, entre otro den e reunion di diabierna awo caba.
Handbook
Di parti di compania, nan a hala atras e handbook. No mester lubida cu e compania tin derecho di tin reglanan di cas y den e reglanan ey nan tabata existi caba den e contracto colectivo. Solamente compania a bisa cu nan ta desea nan pa maneha nan pafo di e contracto colectivo. Aki a surgi e discusion. Pero pa haci e situacion mas facil, e compania a bisa cu lo kita e handbook for di mesa. Si mester ta asina cu mester tin texto nan mas cla, entre otro riba e asunto di trahamento di overtime, cual ta kere cu nan lo supera tambe.
