Luna di october ta luna di Mama Maria y lo bay tin no solamente resamento di rosario pero diferente Santo Sacrificio di Misa riba dia prome di october proximo, esta diasabra awo.
Pa 6:15 am, lo cuminsa resa Santo Rosario na Kapel di Alto Vista y na kapel di Centro Curason di Maria na San Nicolas (ex-Blue Army).
Pa 7:00 am, Santa Misa ta cuminsa na Kapel di Alto Vista.
Prome cu Santo Misa ta resa Santo Rosario pa 6.15 am “Misterio Gososo”, despues ta sigui cu Salve Regina. Ta invita tur devoto y fiel di Mama Maria pa asisti n’e Santa Rosario prome cu Santa Misa. E ta intercede pa nos na nos Tata Celestial. Tur fiel di Mama Maria ta bin resa e Santo Rosario pa bienestar di henter comunidad di Aruba, papa Francisco, Obispo Luis Secco, tur sacerdote, Diacono y laico cu ta hiba e bon noticia p’e pueblo di Dios. Pa nos gobernantenan y tur cu ta carga responsabilidad pa nos pais Aruba. P’e enfermonan den exterior cu a bay busca nan salud y cu pronto lo regresa Aruba pa sigui gosa di un bon salud den di su famia.
Luna di october ta dedica na Mama Maria. En berdad ta luna di flor. Ban canta Luna di october, ban pidi Hesus yuda nos den nos necesidadnan. Ban hinca rudia busca refugio cerca nos Mama Celestial. E ta guia nos riba e Caminda cu Dios ta, ey mi kier biba. Cu Mama Maria den nos curason, nos Mama stima, compaña nos den e caminda di Señor.
Ban hunto resa pa nos hogar y nos isla Aruba y henter mundo, pa tin paz y comprension un
pa otro. Den nos oracionnan resa pa Ucrania y Rusia, cu nan por yega n’e paz desea.
