Fraccion MAS a duna nan punto di bista riba e conclusion di IPKO. Diabierna a tuma luga e reunion di Rijksministerraad y e aannwijzing keto bay ta riba mesa, cual no a trat’e ainda. Gobierno a manda zienswijze, pero te fecha di awe parlamento mes no a haya esaki pa mira kico ta e solucionnan of pasonan proponi a base dje propuesta di aanwijzing.
drs. Marisol Lopez-Tromp, lider di fraccion MAS, a indica cu loke tabata importante ta cu a tuma luga reunion di Rijksministerraad. Aki van Huffelen a trece dilanti diferente ponencia pa loke ta e aanwijzing cu ta riba mesa ainda. Pa loke ta e aanwijzing sugeri pa Cft, tin un procedura con ta encamina esaki. E punto ta keda cu Aruba como pais, “nos mes, como pais y gobierno, mester drecha e situacion financiero na cas.” E presupuesto, e stapnan cu ta tuma, e consehonan cu tin di sigui.
Loke MAS tin entendi ta cu gobierno a entrega e zienswijze, un punto di bista loke a sali fo’i Rijksministerraad. E parlamentario a indica cu parlamento no a haya pa mira e zienswijze. No tabatin un reunion unda a papia riba dje, haya splicacion y presentacion. Lopez-Tromp ta haya cu ta importante pa gobierno trece dilanti como solucion of paso cu nan ta bay tuma a base di e propuesta di aanwijzing riba mesa. “Ban wak den e dianan dilanti kico ta bay sosode prome cu e siguiente Conseho di Reino”, el a indica, cual lo tuma luga dia 21 di october proximo.
E parlamentario a indica cu e reunionnan di IPKO a finalisa diabierna cu lista di palabracion cu tabata presenta despues oficialmente cu firmamento di documento entre e paisnan cu a participa. E temanan ta conoci cu nan a trata den e reunionnan aki, aparte di tur presentacion cu nan a haya. A papia cu persona di Raad van Staten, a papia di democratisch deficit, tambe di e leynan di consenso, e pasado riba colonisacion y sclavitud.
Punto importante cu a conclui entre Corsou y Sint Maarten ta cu lo bay tin mas comunicacion cu otro por medio di Tripartiet. Segun Lopez-Tromp, no solamente pa ora di prepara pa tipo di reunion asina ki, pero tambe pa entre e islanan mes por tin miho comunicacion riba diferente tema y interes comun. No por lubida cu e temponan aki IPKO ta dirigi riba cooperacion cu otro. Esey ta e meta pa cual ta bini hunto riba e plataforma. Loke a resalta e biaha aki pa lider di fraccion MAS aparte di tur e temanan trata, den tur e añanan cu el a participa den e reunion aki, presidente di delegacion no a consulta debidamente cu oposicion pa loke ta e ponencianan treci dilanti como delegacion.
No por lubida cu ora di bay IPKO, no ta haci esey como partido, no ta bay como fraccion. Nan ta bay pa representa Aruba y esey ta hopi importante pa bin dilanti riba diferente tema cu tin acuerdo riba dje. Pero si no tin acuerdo riba tema, no por sali dilanti cu e punto di bista ey comosifuera ta di e pais of delegacion. Esey ta loke a pasa riba e tema di sosten di likides y a bin e discusion cu si e presidente y lider di delegacion a trece dilanti pa mira riba posibilidad di kwijtschelding of keda sin paga. Esey no tabata discuti ni palabra entre e delegacion.
