Diadomingo ultimo 30 di Juli piscadonan di rond Aruba a bini hunto na Hadicurari pa celebra Dia di Piscado 2019 cu un tremendo torneo di pesca y dia di famia.
E di 25 torneo di Dia di piscado a conta cu mas di 39 boto inscribi unda na final di atardi e balansa a papia cla, mustrando cu Aruba por produci pisca, cu un total di 919.2 Kilo di pisca oficialmente registra. Un cantidad record pa loke ta participacion y captura, especialmente considerando con duro e biento tabata y coriente di awa no faborabel. Un palabra di pabien na tur e participantenan.
Ganadornan di mayor ehemplar:
E Dorado mas grandi a bay pa e boto Persistence di capitan Marcelino de Jezus cu a pisa 6.3 kg. E boto Susan di capitan Franklin Henriquez a trece e Carpitan mas grandi cu a pisa 3.8 kg. E pishiporco mas grandi a pisa 2.1 kg y a bin di e boto Shasha di Candelchi Boys di Capitan Ido Kelly. E picuda di mas grandi a pisa 6.3 kg., treci tera pa nada menos cu Picuda Boys di capitan Jacinto “Chin” Christiaans. E boto Shakim di capitan Raul Croes un biaha mas a resulta entre e ganadornan anto e biaha aki cu dos (2) mayor ehemplar. Shakim a bay cu e Mulato mas grandi cu a pisa 34kg y e mayor Conofes a pisa 12 kg. Shaustiene di capitan Jacintho “Chin” Kelly a bay cu e Djampou mas grandi pisando 36.1kg y cual a resulta e mayor ehemplar di e torneo tambe.
Ganadornan di Categoria Open:
Na di 3 luga a keda e boto Shakim di capitan Raul Croes cu a pisa un total di 55.7kg.
Na di 2 luga den open a keda e boto Doña Rita, di capitan Louis Sheik Orman, cu a pisa un total di 63.2 kg di pisca. E ganador di e categoria open tabata e boto Tonino di famia Briesen cu capitan Leo Briesen cu a kibra balansa cu 89.6kg y cual ta e kilahe mas halto di henter e torneo alabes. Tonino a bay cu e pot di categoria open tambe.
Ganadornan di Categoria Crioyo Tradicional:
Na di 3 luga a keda e boto Rosalia di capitan Tivo Vasquez cu a pisa 55.7kg.
Na di 2 luga den categoria di boto chikito piscando na man a keda e boto Virgen del Valle di capitan Gregory Wernet cu a pisa un total di 63 kilo di pisca.
Ganador di e categoria crioyo tradicional tabat e boto Melchior di capitan Omar Andrade cu a pisa un total di 84.7 kilo y asina a bay tambe cu e pot di e categoria. Tambe e boto a bay cu e premio estimulo como e boto crioyo cu mas kilahe.
Baluarte homenahea:
Centro di pesca hadicurari a rindi homenahe na sr. John Laurence como baluarte di piscamento, gradiciendo su persona pa su aporte na comunidad di piscado. Sr. Laurence alabes tin mas di 40 aña piscando y ta un digno representante di piscadonan.
Piscadonan di e centro, mirando cu tabata e di 25 aña di e torneo, a cera cabes y a duna un reconocimento tambe na sr. Byron Boekhoudt kende ta envolvi cu e centro y su torneonan pa gran parti di e 25 añanan aki. Pabien na ambos galardonado.
Pabien y danki:
Comision organisador ta yama danki na tur patrocinado, voluntario y participantenan pa haci e evento aki exitoso un biaha mas. Centro di Pesca Hadicurari ta sigui traha na vanguardia di piscadonan di rond nos isla y tin planes pa varios actividad den tur distrito den e añanan nos dilanti. E fundacion ta un combinacion unico entre piscadonan, gobierno y e departamento di pesca, pa di e forma aki aporta na engrandece e cultura di piscamento di nos isla.
