For di prome instante tabata menciona cu e atraco na Washington ta hole na un inside job. Hendenan cu experiencia a comenta cu loke a sosode ta mustra hopi straño. E storia di e victima no tabata mustra uno fuerte y facil pa kere. E caso a sosode dialuna dia 23 di December banda di 10or di mainta. A atraca un dama trahado di Mathew Restaurant. El a yega bou grito na e cas na Washington unda eynan el a bati alarma.
A kere cu ta un hende cu problema di cabes a yega y spanta e habitante. A resulta cu e tabata un supuesto victima di atraco e momento ey. A cuminsa un investigacion.
No tabata tin arma den e atraco. Pesey mes recherche di Noord mes a tuma e investigacion. Segun e prome version di e victima, el a dal e homber cu auto. Djey e kier a bay yuda e homber cu supuestamente tabata herida. Hasta tabatin brasa na sanger cu herida pa motibo di e accidente.
Ora a hink’e den e auto el a dal e dama trahado na stuur. Djey el a coy e placa di e Restaurant bay cune. Tabata benta di tres dia cu tabata riba sienta den e auto di trabou. E homber a bay cu algun mil florin y disparce sin cu por a haya sa unda el a bay. A buske pa basta rato sin cu por a topa cune. A investiga den e auto tambe.
No a mira ningun mancha di sanger of sushi di un hende cu a ser gedal cu auto. Mientrastanto a core hiba e señora warda. Eynan a cuminsa papia cune y lag’e splica mas cu un biaha kico a sosode como victima di e atraco. Den proceso e declaracionnan tabata asina confuso cu el a bira sospechoso di e atraco.
E ta deteni como sospechoso riba e mesun dialuna di atraco. El a perde su trabou y su Pasco. Mirando henter e desaroyo aki nifica cu por spera mas detencion. E chens ta grandi cu ta un bon conoci di dje of un colega di dje. Depende con nan a coordina e atraco di dialuna.
Di otro banda mester bisa cu si e trahado deteni ta culpabel, nifica cu henter e drama cu yoradera y altera pidiendo auxilio na e cas na Washington, ta haci’e un bon actor pa cualkier pelicula.
