Awe mainta recherchenan di Landsrecherche a detene Pieter J. Franken, miho conoci como Jeff, naci dia 2 di augustus 1962 y biba na Madiki Kavel. Ta sospech’e di tin di haber den e caso cu a haya e nomber di Avestruz. A deten’e na momento cu a trec’e oficina di Landsrecherche riba Vondellaan y den oranan di atardi a laga encarcel’e pendiente e investigacion andando. Esaki ta di dos detencion den e mesun investigacion aki.
Despues di un aña y mey cu a haci e prome entradanan hudicial, autoridad a cuminsa haci prome e prome detencionnan den e caso Avestruz, den cual ex-minister Benny Sevinger ta e sospechoso principal. Ayera miembronan di Lands Recherche y Recherche Samenwerkings Team (RST) a detene un dama y awe un homber.
Jeff Franken no ta un figura desconoci den comunidad. E ta maneha varios compania, cu ta haci trabounan di intermediario, pa trece bendedonan y cumpradonan cerca otro. Tambe e ta encabesa varios compania di construccion. Envolvimiento di Franken den negoshinan a hasta causa cu su nomber ta aparece den Panama Papers, den cual e ta sea director, doño of responsabel pa varios compania. Parce cu e sa haci e trabou di representacion den forma di persona natural di doñonan stranhero. Cua di e companianan aki ta esun envolvi den e investigacion penal aki, no ta conoci ainda.
DEFENSA DI JEFF FRANKEN
Bufete di abogadonan Carlo tin encargo di defende e comerciante aki awo. Awe merdia nos a topa cu abogado mr. Jurney Tromp, di e mesun bufete aki, cu a sinta cu e cliente durante su prome interogacion. E ta un proceso normal, segun e abogado, kende a splica cu e ta eynan den representacion di su colega mr. Vito Carlo. Kico ta e acusacionnan precies contra nan cliente, e no por a bisa ainda, sino djis confirma cu Franken lo keda encarcela pendiente e proceso penal andando.
E CASO AVESTRUZ
Ministerio Publico a informa dia 2 di october 2019, dia cu a haci e huiszoekingnan, cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. E entradanan aki a tuma luga den cuadro di un investigacion penal di Landsrecherche pa posibel delitonan di corupcion y otro hechonan castigabel posiblemente cometi relaciona cu otorgamento di terenonan di gobierno.
Mas concretamente: E investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di pais Aruba den e añanan 2009 te 2017. Ademas ta investiga e rol di ex-minister Benny Sevinger den esaki.
