Dialuna merdia tabatin un control policial den Ranchostraat den cual a para un auto. Ta trata aki di un Nissan Cube RHD color biña bayendo direccion pabou. Ora cu polis a para e auto pa controla esaki, a tuma nota di tres persona den e vehiculo. Un chauffeur masculino y un hende muhe cu un mucha chikito tabata den e auto. Ora cu a pidi documento, a resulta cu e chauffeur no tabatin un rijbewijs riba dje. Esaki naturalmente a conduci na detencion.
Basa riba esaki y mirando e area den cual e detencion a tuma luga, polis a dicidi di haci un control mas profundo den e vehiculo. Durante esaki, a bin topa un suma cuantioso di algun mil florin. Ta trata aki di un suma di entre 5.000 pa 6.000 florin. A confisca e auto, a tuma e placa den beslag y a hiba e chauffeur en cuestion pa warda.
Aworaki, e chauffeur lo tin cu bay duna cuenta di unda el a saca e placa aki. Segun e pareha dje chauffeur, ta un bisiña a prest’e e placa aki pa cumpra un boto. Si esaki ta e caso en berdad, e lo haya su placa bek, pero, lo haya un boet si pa tabata conduci un vehiculo di motor sin rijbewijs.
