Riba diadomingo mainta, varios individuo a haya ta bon pa busca manera di drenta tereno di Cuerpo Policial. Esaki ta un tereno completamente cera cu heki. A purba yega e celnan di ward’i Shaba, polis a reacciona rapidamente y detene tres persona. A detene un den cura di ward’i polis, un den un cura di cas y e ultimo pafo di e area di warda. E polisnan a subi dak pa wak kico ta haya riba e ‘complex’ di e celnan, a logra haya un telefon. Polis y miembro di cuerpo tecnico a atende e situacion.
Vocero di cuerpo policial, Lito Lacle, a informa cu 5:50 am, polisnan atento di ward’i Shaba a wak via camara tres persona pafo di e compleho di celnan. Den e area a detene un hende di muhe, di 18 aña. E otro dosnan a core bay pero a logra detene nan poco mas leu di warda. Departamento tecnico di cuerpo policial a confisca varios cos y ta ocupa cu e investigacion pa saca afo kico realmente tabata nan intencion.
E warda policial ta complemente yen. Tur tres ta cara conoci di husticia, pues ta ‘cliente vast’. Nan ta conoci di e detenidonan cu a horta brommer den warda di Balashi. Polis lo mester saca afo kico exactamente nan lo kier a haci, pues nan lo tin di duna un declaracion. Lacle a comenta cu prome cu nan duna un declaracion “nan lo tin di saca nan wayaba prome” pasobra tur tres ta bou influencia pisa di alcohol y kisas te hasta di algo mas.
E edificio ta completamente cera y camara di e edificio a graba tur locual a pasa.
Detencion Balashi
Riba dia 26 di october algo prome cu 5:00 am, central di polis a haya notificacion cu personanan lo a drenta warda di polis na Balashi y bay cu un cantidad di brommer/ scooter. A activa tur unidad di polis riba caya como tambe helicopter. A logra detene tres hende homber y a recupera te cu mainta dies brommer/scooter. Recherche ta investigando e caso.
