Patruya di varios districto a bay reforza nan coleganan na Santa Cruz. Diadomingo a habri cu un asistencia di Polis pa un fiesta cu a bay completamente for di man. Un fiesta cu for di diasabra anochi tabata andando, durante henter marduga y te den oranan di mainta ainda no tabatin fin.
E musica, e desordo cu tur esaki a trece cu ne a pone buchi yena di varios habitante di e bario y diferente yamada di molester a cuminsa drenta.
Esaki a pone cu polis a bay direcion Papilon 89-D pa pone un paro na e fiesta aki.
Na e cas mes e situacion no tabata facil pa e agentenan cu tabata atende cu e asistencia. Y banda di 7:30 e patruya a pidi nan colega pa refuerso, pasobra cos tabata bayendo fo’i man.
Polisnan di varios distrito a bay rapidamente na e adres pa pone ordo. Na e sitio dos detencion a cay. Asina mes esnan den cas tabata keda grita y haci cherche di e polisnan para pafo te ora e polisnan a bandona sitio.
