Recientemente a señala e ex-contratista, declara den bancarota e tempo aya, Karel Arends, hunto cu e Parlamentario Independiente, mr. Dr. Rycond Santos do Nascimiento. Arends a confirma cu e ta conseh’e y ta premira cu Rycond Santos lo bira un lider hopi grandi.
Den un publicacion riba Facebook, Karel Arends mes a skirbi cu el a conseha mas politico grandi di Aruba y a haci nan vote-getter. Asina el a sigura di a consega Henny Eman entre aña 1978 te cu 1999, pues durante 21 aña largo. Cu su conseho Eman a bira vote-getter algun biaha. Ta bon pa menciona cu Henny Eman ta biba cu ruman muhe di Karel Arends.
Pero despues di aña 1999, el a tuma un break un rato pero a continua cu su trabou di consehero politico, pero a opta pa bandona AVP y bay conseha Partido MEP. Asina e ta bisa di a conseha Evelyn Wever-Croes entre aña 2008 pa aña 2016, net prome cu el a gana eleccion. Ta obvio cu ora Wever-Croes a stop di sigui conseho di Arends, cu el a crece enormemente den voto.
Karel Arends ta insisti cu e no ta conseha politiconan na Aruba so, sino na Corsou tambe. Ey el a asesora defunto Helmin Wiels entre aña 2011 pa 2013.
Pero pa awo e tin un cliente nobo y ta Rycond Santos do Nascimiento. Den su mes palabra e ta bisa “Profesor Rycond tey bira un lider hopi grandi”.
Mester menciona cu Santos a participa den eleccion parlamentario pa prome bes na aña 2021, riba lista di partido AVP. A dun’e number cinco y el a haya solamente 214 voto. Mester menciona cu e candidatonan despues di dje, esta na number 6,7,11 y 18 a haya mas voto cu ne.
Santos a opta awo pa funda su mesun partido y ta conta cu sosten di varios ex-politico, entre otro di Partido MEP pa yud’e.
Nos a acerca dirigentenan di Partido AVP y nan a sigura cu e locual Karel Arends ta bisa, cu el a conseha Henny Eman pa 21 aña largo, no ta berdad.
Karel Arends tabata propietario di Arends Construction pero a bay bancarota. E tabata den klas cu Rycond Santos na Universidad di Aruba pa bira hurista. Santos a caba e estudio, a sigui studia pa bira docente y Karel Arends nunca a caba e scol y nunca a bira hurista.
