Roy a traha den diferente departamento di gobierno y despues na ATA Europa y te cu su pensioen na Arubahuis. Su meta na Hulanda tabata pa studia comercio mercadeo y despues di termina esaki ela ocupa e funcion di regional director di Benelux te cu 2010 na ATA Europa. Su deseo tabata pa habri e mercado di Belgica pa Aruba, asina crea mas fluho di turista Europeo pa Aruba. Tambe ela logra gana un premio na Hulanda cu campaña “Gun JeZelf Aruba”.
Despues cu ATA a bira Sui Generis, Roy a opta pa keda traha den Gobierno y a haña un funcion na Arubahuis como Senior Adviseur di afdeling Economische Acquisitie. Den e funcion aki ela traha te cu awo cu ela baha cu pensioen. Durante su funcion na Arubahuis Roy a traha directamente cu diferente Ministernan Plenipotenciario manera Edwin Abath, Alfonso Boekhoudt, Juan David Yrausquin y por ultimo cu Guillfred Besaril. Como parti di su funcion Roy la traha cu varios organisacion nan na Hulanda y organisa eventonan pa atrae invercionistanan pa Aruba.
Minister Plenipotenciario Guillfred Besaril a gradici Roy Hart den nomber di staf y personal di Arubahuis pa tur su trabaonan hasi pa Aruba y pa Roy disfruta hunto cu su famia di su pensioen bon mereci. Como recuerdo Minister Besaril a haci entrega di un plakkaat na Roy Hart como aprecio pa su añanan di servicio pa Pais Aruba.
Tambe tabata tin palabranan di felicitacion y aprecio di ex-Minister Plenipotenciario Edwin Abath y Alfonso Boekhoudt, actual Gobernador di Aruba na Roy Hart pa e temporada cu nan a traha cu ne na Arubahuis.
Diparti di su famia Roy a ricibi tambe e mihor deseonan pa su persona y su famia den e etapa nobo di su vida. Deseonan bunita di su mama y ruman na Aruba y tambe di su ruman cu ta biba na Merca.
