Awe mainta un ciudadano a cuestiona riba Facebook con pa apertura di Weganan Escolar, con a laga e muchanan bay di trempan y a tene publico leu di gobernante. Un desconexion cu ta refleha e realidad di awendia, cu antes politiconan semper kier tabata cerca di pueblo, mientras awe e maneho nobo ta “mas leu, miho”. Y a subraya e desconexion ora a manda pan cu juice pa mucha mientras minister y parlamentario tabata brinda cu biña den man, anto na evento deportivo pa mucha!
E apertura a tuma luga den stadion. A wanta tur minister, parlamentario y na famia den VIP mientras cu mayornan por a sinta te na otro banda, pa mira nan yiunan cu lomba. Nan no tabatin opcion pa cumpra nada di come of bebe, ni cu nan mes placa. E muchanan cu a participa a para oranan largo pa na final nan haya un saco cu hotdog bon friu y un paki juice.
Por lo menos un mayor a tribi di demostra su malcontento, no pa e pan cu juice, pasobra e mes tin placa pa cria su yiu, sino pa e desconexion y e arogancia di e gobernante pa no lubida e contraste, den cual tur dia ta realisa cu pueblo y e mucha no ta central.
Centenares di mucha y nan mayornan a yega na e evento aki, pa realisa hopi lihe cu aki deporte no tabata central, sino a compronde masha lihe cu ta campaña politico a cuminsa. Ta parce cu Gabinete Wever-Croes ta realisa cu e presion di Madre Patria, situacion economico y descontento den pueblo ta aumentando asina hopi, cu lo no dura mucha mas cu lo bin cambio den e panorama politico.
Campaña pasobra locual si a percura p’e ta pa parlamentario y minister por a yega cu henter famia, waiter tur caminda pa percura pa snacks y co’i bebe, incluyendo alcohol, pa tur. Sacament’i potret comosifuera cu nan ta e evento y no e muchanan. Discurso politico no a falta, sin menciona cu di aña pasa a anuncia cu lo drecha Stadion Guillermo Trinidad entre Minister Dangui Oduber y FIFA y te awe nada. Tampoco a menciona con mas lo yuda deporte pa stop muchanan para na rotonde bende rifa. Y mas ainda, mientras a nota parlamentario brasa tur na smile cu director di SKOA, ainda no ta menciona cu siguridad cu schoolgeld lo no aumenta mas! Ta parce mas bien cu tabata grabando un programa di “cuanto vale el show” pasobra e politico tabata central, no e deportista.
Riba dje, a atrae un celebridad local pa ta presente, pero casi e mucha no a haya chens mes pa por a yega cerca ni pa duna un man, corda pa saca potret. Pero si a mira e politico y nan famia cu potret tur rond di nan cube celebridad, den cierto forma la mustra “poder” cu nan si por.
E publicacion riba red social a bay viral mesora y hopi e compartie den whatsapp tambe. Comentarionan tur ta negativo contra Gabinete Wever-Croes y Minister Endy Croes, cu di berdad ta demostra un incapacidad total pa maneha tanto Ministerio di Enseñansa como di deporte, cu tampoco no a nota ningun cambio ainda desde su postulacion.
