E preparacionnan ta andando pa asina tur e personal di diferente departamento y instancianan priva ta in place pa ricibi un grupo grandi di persona.
E prome personal cu tin cu atende un situacion manera esaki ta Departamento di Salubridad Publico pa coordina y hunto cu tur e instancianan, por ricibi e grupo di personanan cu ta yegando for di St. Maarten cu tin mester di yudansa. Director di Departamento di Salubridad Publico, Jerry Staring, ta conta cu nan ta bezig for di comienso di siman cu Rampenstructuur, cu nan conoce na Aruba, hunto cu polis, DOW, Brandweer, Rampenbureau y Sociale Zaken, ta bezig ta wak kico tin pa ofrece nos hermana isla St. Maarten.
Tin basta pa ofrece den forma di manpower, pero tambe na material. Awor aki a haya un peticion pa duna sosten pa personal cu mester haya dialyse.
Claramente esey ta un grupo di hende hopi fragil y e situacion awor aki na St. Maarten no ta suficiente cla pa bisa cu nan por of nan no por duna e cuido necesario. Pesey a bay di acuerdo pa vang op un grupo.
Staring a splica cu nan lo bay wak con pa bay duna un sosten a lo maximo, hunto cu nan partnernan den Gele Kolom den cuido, es decir HOH y tambe Imsan.
Preparacion
Tin un cantidad bastante grandi di hende. Loke tin di compronde cu seguro via Boneiro, ta cubri tur e gastonan aki. Nan a haci tambe reservacion pa cierto hotelnan pa e personanan aki keda. Tin cu haci un assessment cuanto hende por haya un cuido ambulatorio, esta nan ta bin dialiseer y nan ta bay bek hotel y tin cu wak tambe cuanto hende tin cu keda interna of ta den asina un estado critico cu no por bay na un hotel of famia.
Bon prepara
Tabata riba un diabierna atardi y mester a pone personal den accion. No mester lubida cu desde dialuna caba, tur hende riba veld ta prepara cu e momento ta bay yega cu tin cu duna un sosten y awor aki e momento riba diabierna berdad, pero no ta nada. Pasobra full e departamentonan di tanto den cuido como polis, brandweer, DOW, Sociale Zaken, ta cla pa duna sosten den loke tin mester.
Otro peticion
Te awor aki no tin otro peticion. Ta bezig ta haciendo assessment y ta cla pa ricibi e peticionnan na momento cu nan drenta.
