Lo bay tin yegada di un grupo grandi di persona cu ta bin for di St. Maarten y ta bin pa nos na Aruba, esta pa e institutonan medico, duna un man na nan. Tin diferente motibo pakico nan ta bin. Un di nan ta pashentnan di dialyse.
Director di Imsan, dr. Joel Rajherc a papia den nomber di henter e comunidad medico di Aruba pa asina brinda un man na nos hermana isla di St. Maarten, cu tur e sufrimento cu nan tin eynan. El a sigui splica cu lo bay yega den 3 vuelo aproximadamente, entre 60 y 64 pashent di Dialyse. Esakinan ta e prome hendenan cu mester di auxilio, pasobra, ora cu riñonnan no ta traha y tin mester di dialyse, ta cada otro dia mester di tratamento.
E personanan aki tin tres, cuater kisas cinco dia sin cu nan a wordo dialisa. Esaki ta pone nan den un situacion hopi critico. Ta spera cu e prome grupo cu ta yega lo ta hopi malo. Tin hunto cu dr. Horacio Oduber Hospital y Imsan, tur dos instituto ta trahando tremendamente bon hunto. Tur e nefrologonan ta trahando hunto. Tur e enfermeranan di dialyse ta trahando hunto. Pero tambe e supportive teams, hendenan cu ta busca cuminda pa e hendenan aki. Hendenan cu tin cu busca cuminda pa e propio personal cu tin cu traha personal.
Tin e laboratorionan priva y esun di hospital cu ta haci tur e testnan cu ta necesario. Departamento di radiologia, pero tambe tin cu transporta e pashentnan aki, for di aeropuerto pa sea hospital of na Imsan.
Esunnan den situacion mas critico lo bay hospital, pasobra eynan obviamente tin e cuido intensivo, si pashent tin hopi mas problema cu ta dialyse, cu nan por bay eynan y esunnan cu ta mas stabil, lo bay inmediatamente pa Imsan.
Awe nochi mes, manera cu nan yega, lo cuminsa na aeropuerto cu un triage. Un nefrologo lo ta eynan cu enfermera pa wak cua pashent tin cu bay unda y di e manera ey, of na Imsan, of na HOH, pa nan haya tratamento awe nochi mes. Mesora lo cuminsa.
Estadia
E pashentnan aki awor aki nan ta acuut, pero nan ta pashentnan cronico. Nan riñonnan lo no bay traha diripente mañan atrobe. Den e proximo lunanan, mester keda na un centro unda nan por haya tratamento, kiermen awe nan ta haya tratamento, mañan no, pero otro mañan atrobe. No ta algo cu por stop pa basta dia. Ta spera cu mester tin un opvang pa basta tempo pa e hendenan aki te cu St. Maarten por haya un centro nobo di dialyse pa e hendenan aki atrobe.
Mester bay after hours
Aruba tin su propio grupo di pashent. Hospital y Imsan tin tur dos, dos shift pa dia. Prome mainta y despues merdia ta haci e di dos shift. Awor lo bay tin un di tres shift, pero anochi. Tur enfermero di HOH y Imsan, cu mil amor, a bisa cu nan ta haci e trabao aki. Ta spera cu kisas si situacion bira un tiki mas miho na St. Maarten y cos bay un tiki bon y tin enfermeronan di dialyse eynan, kisas nan por bin Aruba pa yuda cuida nan pashent tambe. Pero nan tambe tin nan propio problema. Ta duna prome opvang, despues ta bay wak con lo sigui.
Refuerso
Dr. Rajnherc a splica cu te awor aki nan no lo haya refuerso. Te awor aki lo bay haci e prome opvang nan mes. Pero ta spera cu lo haya mas ayudo di dokter y dialyse verpleegkundige nan di St. Maarten.
Ambulance
Awe lo bay ta un dia extraordinario pasobra den historia di loke cu dr. Rajnherc sa di e servicio di ambulance, pa prome biaha lo ta tres ambulance riba caya pa normale bezetting pa Aruba. Tin cuater ambulance cu lo bay transporta e pashentnan cu ta yegando for di St. Maarten pa sea hospital, sea Imsan. A pone un rapid responder extra pa duna servicio y un rapid responder extra pa hiba tres pashent, si nan ta zittende pashent cu tin. Y tin un ambulance extra ainda na Palo Marga pa un evento special. Awe si ta wak pakico Aruba mester tin un overcapaciteit di su servicio di ambulance. Rajnherc ta masha orguyoso. E tin hende cu a caba di yega den nan paña di civil y ta bisa pa kita nan vakantie y a bin pa yuda.
Cuanto hende por dialyseer
Hospital tin un capacidad di aproximadamente 21 pashent den un tiro y Imsan tin un capacidad di entre 16 pa 18 pashent den un tiro. Den varios shift tin cu wak cu tur e 64 pashentnan cu ta yega lo haya nan tratamento necesario. Rajnherc ta hopi orguyoso di e bon cooperacion cu nan a mira entre e trahadonan di tur dos di e centronan di dialyse. Mas miho cu e cooperacion aki, no a mira ainda na Aruba.
