Departamento di Asuntonan Economico ta cambia su imagen pa un poco mas moderno. Vooral pa duna mas informacion na tur su clientenan y comunidad en general. Maria Dijkhoff-Pita, Director di Departamento di Asuntonan Economico a bin cu un plan interno pa analisa kico ta e informacion mas necesario pa clientenan.
E website ta den miras tambe di locual ta e e-governance, cu Gobierno kier bin cun’e. Ta un paso chikito na esaki, door di por suministra mas informacion.
Tin algun aspecto cu falta ainda, manera e E-forms, cu ta na caminda. Awor aki e documentonan tey, pero no por submit’e ainda via di e website. Pero esey lo ta e proximo paso. E website lo bay ta creciendo, den miras pa loke ta e e-governance.
Tambe tin e parti caminda por haci cita, cual ta hopi mas facil pa e cliente. E ta haya su cita pa un ora, e ta bin e ora ey y e ta wordo atendi.
Di tur forma a laga algun posibilidad riba diaranson mainta, pa esnan cu no tin computer of cu toch kier pasa personalmente pa busca informacion, cu nan por haci esaki. No por haci afspraak pa e dia aki.
Awor aki caba tin un producto cu ya desde dialuna ta bay por suministra di un forma digital. Te awor aki ta pidi na e cliente, pa e bay na oficina di Censo, busca por ehempel su papel di cinco of di dies florin.
Desde dialuna, e cliente por scoge. E por bay Censo pa bay busca e papelnan y hibanan na Departamento di Asuntonan Economico of e cliente por bay eynan, duna autorisacion. Departamento di Asuntonan Economico, tin un combenio cu Censo cu nan por wak e informacion specifico eynan. E ora por haci e tramitenan cu normalmente ta uza papel. E cliente mester paga si e suma di 5 of 10 florin na Censo.
Ta e prome departamento cu a link cun’e. E idea ta pa e otro documentonan tambe cu ta necesario pa ora di pidi un permiso, cu poco poco e otro productonan ey, tambe lo wordo gelink automaticamente. Ta un proceso, no ta bay ta cla mañan, pero ta spera cu den algun luna, por ta un aña lo por tin tur.
Ta trahando conhuntamente cu Futura, cu oficina di Prome Minister, pa tur loke ta e parti di E-governance. Ta siñando hopi di nan y trahando hunto pa asina mehora e servicionan.
Vision di innovacion
Sharon Meijer-v/d Linden, policy advisor y business development na Directie Economische Zaken y tambe unidad di Exprodesk, a splica cu e departamento, siguiendo den e vision di Minister di Finansas, Asuntonan economico y Cultura, mr. Xiomara Ruiz-Maduro, e vision di innovacion di bin pa crea e clima, pa facilita pa nos negoshinan por crece y haci negoshi den un manera mas facil, a lansa un website, unda cu nos negoshinan por bay y haya tur informacion cu nan tin mester riba dje.
Departamento di Asuntonan Economico kier un imagen nobo. A bin cu un logo nobo tambe. Pa por a yega na dje tabata un balanse entre innovacion pero toch e parti formal como departamento di gobierno.
Den e grafico e ta simbolisa monedanan di un economia creciente y tambe loke e departamento ta nifica cu nan kier traha, mehora nan servicionan pa e comunidad di Aruba y nos negoshantenan.
Atrabes di e website nobo, ta structura via topico. Por ehempel si nan kier sa riba e maneho di e economia, nan ta bay eynan. Si nan kier sa por ehempel di haci negoshi, tin un seccion special pa haci esaki. Eynan nan por haya tur informacion di cua permisonan nan tin mester.
Si nan kier haci un cita tambe, nan por haci esaki via e fecha y e ora cu nan kier. Nan por scoge cua servicio y e ora ey nan ta yega, di manera cu no tin tardansa mas, cu mester warda den rij largo.
Pero tambe e formulario di aplicacion por wordo yena online. Esaki ta e prome fase. Awor aki lo bay pone mas informacion y mas documento riba dje. E di dos fase ta bay ta cu e formularionan por wordo yena directamente online. Despues lo bay bin cu e e-government y e-forms, di manera cu e negoshantenan no lo mester di sali for di cas mas.
Awo tin cu bay cu e era digital y haci’e mas facil pa e negoshantenan na Aruba y brinda tambe servicionan pa personanan cu kier bin inverti for di afo.
