Diaranzon marduga banda di 3or a sosode un accidente basta serio riba e caminda di Savaneta. Dos auto a keda hopi kibra den dos diferente accidente. E di dos accidente a spanta tur esnan cu tabata presente na e accidente riba e caminda principal direccion San Nicolas. E prome accidente tabata un Nissan March color shinishi direccion San Nicolas. E auto Nissan March A-74383 tabata maneha pa un dama. E dama bayendo direccion San Nicolas a hala cu su RHD na man robez y dal den e cura di cas na Savaneta.
E impacto tabata fuerte y e dama a keda herida cu basta sla na curpa. A yama Polis mesora y na yegada a haya e dama drumi abou banda di cura. A pidi pa ambulance cu urgencia. Dor di e impacto hasta e motor di e March RHD a kita for di e auto keda benta mey mey di caminda.
Mientras cu Polis tabata investiga y paramediconan preparando, un Avensus color preto A-57869 tabata biniendo di pabou direccion San Nicolas. E chauffeur coriendo poco duro tambe a pasa bay ariba bin dal den e motor di e March cu tabata mey mey di caminda.
E motor a spat bon pida leu y dal den un cura di cas. E impacto aki a pone tur hende spanta y purba core. Finalmente a resulta cu no tabata tin hende herida den e di dos accidente. Un investigacion mas profundo a cuminsa. A yama specialistanan di trafico pa asina bin atende e accidente. E caminda a keda sera te banda di 6or di mainta.
A desvia e trafico y basta hende tabata bayendo trabou e momento ey. E famia di e victima den e March a wordo avisa pa bay Hospital. E tabata mustra grave pero no tabata critico. E impacto si tabata fuerte. Ambos auto a ser hala for di caminda cu takelwagen.
