E homber di 25 aña Dennis Eduwardo a admiti di tabatin relacion sexual cu un menor di edad. “Pero tin un storia tras di e sucedido,” el a bisa hues diabierna mainta durante un caso penal contra su persona.
Ministerio Publico a acus’e cu den e periodo di maart 2021 pa juni 2022, el a tene relacion sexual cu un mucha muhe menor di 16 aña. Tambe a acus’e di posesion di material pornografico di un menor di edad. “Ta berdad cu mi a tene relacion cu e mucha muhe cu ta menor di edad. Pero tin un storia su tras. Mi tabatin tur bon intencion cu e mucha muhe. Mi a namora di dje y mi intencion tabata pa nos casa y forma un famia”, tabata e prome cos cu el a conta hues diabierna mainta.
Pero un poco tempo despues cos a bay fout na momento cu el a ripara cu e mucha muhe si no tabata tin e na serio. El a conta cu e mucha muhe tabata tene relacion cu otro homber di edad. Nan a pleita y el a bisa cu e lo conta su mama, kende a tuma e situacion como un menasa y asina cos a sali for di man. Dennis a conta cu e tabatin problema cu droga pa cual nan a mand’e Santo Domingo na maart 2021, pa rehabilitacion. Mientras cu e tabata aya, el a conoce e mucha muhe via di Facebook. Nan tabata chat cu otro.
E menor a duna un declaracion diferente. Segun el a bisa, e no tabata kier a tene relacion cu e acusado, kende ta esun cu a keda presion’e. E version aki a laga e acusado sorprendi pasobra, segun e ta bisa, e mucha muhe tabata bis’e pa bay busc’e na scol y a keda drumi na su cas.
Tambe a sali na cla cu, aunke cu el a delete nan, el a saca potret y haci video di dje cu e mucha muhe. E ta bisa cu ta e menor a pidie haci esey y ambos a bay di acuerdo pa haci un video ora nan ta tene relacion sexual. El a manda e video pa e mucha muhe y despues a delete esaki.
E relacion a yega su fin na juni 2022, despues di varios kibramento y hacimento di bon. Hues a puntr’e riba su circunstancianan personal y a admiti cu e tabata adicto na tur sorto di droga, heroina, cocaina y piedra. El a bay Santo Domingo pa rehabilita y awo de bes en cuando e sa uza marihuana. El a caba su EPB y kier studia pa mecanico na Hulanda.
A pidi un castigo di 3 aña di cual 1 aña ta condicional y dos aña di prueba. Banda di esaki, a pidi pa e acusado bay bou di guia di Reclassering. Hues a tuma un pauze cortico pa pensa y a dicta sentencia mesora despues. El a haya e delito proba pa e periodo nobo cu fiscal a papia di dje y ambos acusacion a keda proba.
No ta haya cu e acusado aki tin un tendencia di pedofilia sino tabatin intencion cu e mucha muhe aki y lamentablemente el a namora di un menor. El a coopera cu e investigacion. Aunke cu no ta haya cu e tin caracteristica di ta un pedofiel, den comunidad e lo haya e stempel aki pa cual a haya necesario pa e bay bou guia di Reclassering. E castigo a bira 30 luna di prizon di cual 10 luna ta condicional, kitando e tempo cu el a pasa cera y un tempo di prueba di dos aña. E acusado a bay di acuerdo cu e sentencia.
