E pago di Afl. 15 miyon cu AZV a pone na disposicion di Hospital Dr. Horacio E. Oduber (HOH) ta duna hospital espacio pa cumpli cu su obligacionnan durante algun siman. Parlamentario Dennerich Kelly ta pidi pa uza e tempo aki pa garantisa continuidad di cuido y yega na un acuerdo di financiamento pa 2027.
“Como enfermero y parlamentario, mi ta mira e situacion aki cu un prioridad cla: proteha e pashent. Ora un pashent ta den condicion critico, e prioridad ta evalua e riesgo, stabilisa e pashent y reuni e datonan necesario pa sigui cu tratamento. E situacion financiero di hospital ta pidi e mesun disciplina. Nos mester proteha cuido awe, aclara e causa di e problema y tuma decision pa mañan”, e parlamentario a expresa.
Na september, Kelly a reuni cu directiva di HOH pa scucha su preocupacionnan y prepara preguntanan pa minister di salubridad. Durante añanan, demanda di cuido, gastonan y necesidad di personal a cambia, mientras HOH y AZV ainda ta discuti con mester financia e cuido cu hospital ta brinda.
Claridad riba pago y su efecto
Segun directiva di HOH, e pago ta permiti hospital cumpli cu su obligacionnan durante algun siman sin introduci restriccion adicional riba operacion y tratamentonan planifica. AZV ta presenta e suma como un adelanto adicional, cu ta trece e total di adelantonan den 2026 na Afl. 31 miyon. HOH, di su banda, ta describi e pago como compensacion parcial pa cuido brinda na aseguradonan di AZV na 2025.
E parlamentario ta pidi claridad riba con e pago ta wordo registra y contra cua obligacion e ta wordo conta, con lo desconta e adelantonan anterior y ki efecto esey por tin riba likides di hospital na december. Segun e director medico di HOH, cuido urgente mester sigui, pero tratamento planifica por haya retraso si e falta di recurso persisti. Pa un pashent, pospone un operacion por nifica mas siman cu dolor of limitacion. Pashentnan cronico mester por conta cu continuidad di tratamento, y personal di cuido mester tin e medicamento y material necesario pa haci su trabou.
Tres paso pa proteha cuido y acorda financiamento
1. Proteha continuidad di cuido. HOH, AZV y minister mester acorda ki medidanan lo tuma pa evita interupcion di cuido si descuento di adelantonan pone presion riba likides di hospital.
2. Pone e cifranan completo riba mesa. Compara cantidad di cuido brinda, costo real, tarifanan, pagonan y adelantonan pa distingui un falta temporal di likides for di un problema structural di financiamento.
3. Yega na un acuerdo pa 2027. Fiha tarifa, cantidad y calidad di cuido, cu responsabilidadnan cla y evaluacion periodico.
Parlamentario Kelly lo pidi minister pa informa parlamento prome cu cuminsamento di december con lo desconta e adelantonan y ki medidanan ta prepara pa evita interupcion di cuido. Tambe lo pidi un fecha concreto pa presenta e acuerdo di 2027 y lo controla ehecucion di e medidanan acorda.
“Fondo publico mester wordo uza cu dunament’i cuenta. Mientras ta aclara e cifranan, mester tuma e decisionnan cu pashent y personal di cuido tin mester awor. E Afl. 15 miyon a duna nos tempo. Awor nos mester uza e tempo ey pa construi un solucion duradero pa cuido na Aruba,” e parlamentario a conclui.
