E mocion original di parlamentario ing. Mike de Meza pa aumenta salario minimo a conta cu nuebe firma di henter fraccion di AVP. Sinembargo, e version adapta despues di intervencion di Futuro a wordo aproba cu 10 voto na fabor, mientras dos parlamentario di AVP a abstene di vota. Un comparacion di e documentonan ta mustra cu e cambionan ta bay mas leu cu solamente move e fecha di introduccion di januari pa maart 2027.
E diferencianan principal ta den e manera cu a formula e aumento, e garantianan concreto pa compensacion di doñonan di trabou y e tempo pa implementacion. Algun principio central, manera consulta tripartidario y acercamento gradual na e bestaansminimum, a keda den ambos version.
Den su mocion original, Mike de Meza a pidi gobierno prepara y introduci e medidanan legal necesario pa aumenta salario minimo mensual di aproximadamente Afl. 2.007 pa Afl. 2.300 bruto entrante dia 1 di januari 2027. E aumento aki lo mester a representa un prome paso inmediato den direccion di un minimo di subsistencia social y economicamente responsabel.
Aki tin un detaye importante den e documento original: den su consideracionnan e ta menciona un aumento di Afl. 2.007 pa Afl. 2.207, esta Afl. 200 adicional. Pero den e peticion concreto na gobierno, e suma tabata di Afl. 2.300 bruto. P’esey, e mocion original mes ta contene dos cifra diferente cu mester distingui ora di compara e proposicionnan.
Den e version adapta, e peticion pa un salario di Afl. 2.300 bruto a disparce. Na su luga, ta pidi gobierno pa aumenta salario minimo mensual cu Afl. 200 netto, pa mas tarda 1 di maart 2027.
Esaki ta cambia tanto e fecha como e formulacion di e beneficio. E prome mocion ta establece un salario bruto como meta; e di dos ta establece un aumento netto. Sin e calculacion di e deduccionnan aplicabel, no por trata e dos sumanan como si nan ta exactamente e mesun proposicion.
Tambe, e palabra “uiterlijk” den e version aproba ta nifica “pa mas tarda”. Pues, e texto ta laga espacio pa un introduccion prome cu 1 di maart, aunke e fecha limite ta dos luna despues di e fecha cu Mike de Meza a propone originalmente.
Un otro cambio substancial ta relaciona cu compensacion pa doñonan di trabou. E mocion original tabata propone un compensacion fiscal temporal di Afl. 200 netto pa luna pa cada empleado di tempo completo durante e prome aña. Lo por a compensa e gastonan adicional di salario cu e pagonan mensual di BBO, BAZV y BAVP.
Ademas, e original tabata establece cu e areglo fiscal lo conta pa un periodo di maximo tres aña, cu posibilidad pa adapta of reemplas’e si aforda un alternativa efectivo of medidanan structural pa baha costo.
Den e version adapta, a kita tanto e suma concreto di Afl. 200 pa empleado como e periodo maximo di tres aña. E mocion aproba ta sigui pidi un areglo pa compensa doñonan di trabou den sector comercial, pero ta laga mas espacio pa determina su forma y alcance.
E uzo di BBO, BAZV y BAVP tambe a bira un ehempel di con compensacion por funciona, en bes di e mecanismo fiscal specificamente proponi den e mocion original. Pa trahadonan part-time, ambos version ta mantene e principio di compensacion proporcional y ambos ta contempla un solucion pa empresanan cu no ta paga suficiente impuesto pa probecha e compensacion completo.
No obstante e cambionan, consulta cu gremionan comercial y sindical no ta un elemento nobo introduci den e di dos mocion. E documento original di Mike de Meza ya tabata pidi un consulta structura entre gobierno, organisacionnan di doñonan di trabou y sindicatonan, cu participacion di representantenan di sector comercial.
Ambos version ta pidi pa studia e efectonan riba empleo, prijsnan, costo di empresa y poder di compra. Nan ta mantene tambe e instruccion cu consulta y preparacion di medidanan structural no mester bira motibo pa pospone e aumento necesario.
Riba e minimo di subsistencia, conoci como bestaansminimum, e dos mocionnan ta mantene e intencion pa acerca salario minimo gradualmente na e nivel ey. Nan ta pidi evalua y actualisa e calculacion di CBS, cu ta referi na october 2010 como periodo di base, y presenta parlamento un proposicion den fase.
Ningun di e dos mocionnan ta establece un garantia explicito cu salario minimo lo alcansa e minimo di subsistencia den tres aña. E referencia na maximo tres aña den e original ta trata e duracion di e compensacion fiscal temporal pa doñonan di trabou. E tempo ey no ta un fecha limite pa iguala salario minimo cu e minimo di subsistencia.
Politicamente, e diferencia ta remarcabel. E prome proposicion a cuminsa cu respaldo por escrito di tur nuebe miembro di fraccion di AVP. E version adapta, registra como mocion di AVP–Futuro, a termina cu 10 voto na fabor y abstencion di dos parlamentario di AVP, esta Mike de Meza mes y Otami Thomasia.
E resultado ta mustra cu e acuerdo alcansa entre e partidonan di coalicion no a retene e respaldo di henter fraccion di AVP. E mocion final ta mantene e direccion di aumenta salario minimo y proteha poder di compra, pero cu un fecha limite diferente, un aumento formula na netto y menos detaye obligatorio tocante compensacion pa doñonan di trabou.
