E sucesion di drs. Rene Herdé como Minister di Infrastructura y Telecomunicacion a forma parti di e deliberacionnan den fraccion di AVP awe, diamars 10 di november. Segun informacion cu ta circulando rond di e reunion interno, un mayoria di e fraccion a expresa sosten pa actual Presidente di Parlamento, Marlon Sneek, asumi e cartera ora Herdé baha na fin di aña.
E cuater nombernan cu ta circulando pa e funcion ta di Stephany Sevinger, Marlon Sneek, Clifford Heyliger y Jennifer Arends-Reyes. Tur cuater ta forma parti di e representacion parlamentario di AVP. E preferencia cu, segun e informacion ricibi, a sali for di e fractieberaad di awe ta pone Sneek dilanti den e proceso interno. Sinembargo, un sosten mayoritario den fraccion ainda no ta representa un nombramento formal como minister.
E posibel salida di Herdé rond di cambio di aña ya a forma parti di reportahenan publica durante e ultimo dianan. Su sucesion ta habri un discusion cu ta bay mas leu cu solamente yena un puesto: E scogencia por trece cambio tanto den gabinete como den direccion di Parlamento.
Mayoria interno ta inclina pa Sneek
Segun e informacion cu ta circulando, durante e reunion di fraccion a tuma luga un votacion pa determina ken lo haya sosten como candidato pa e funcion ministerial. Un mayoria lo a sostene Marlon Sneek. No tin un resultado oficial publica di e votacion interno cu ta permiti establece cuanto miembro a vota pa cada candidato.
E señal politico, sinembargo, ta cu Sneek ta perfila como e candidato cu mas sosten den fraccion pa sigui Rene Herdé. E siguiente paso lo ta determina si e preferencia interno aki ta traduci den un candidatura definitivo di partido y, posteriormente, den e proceso di nombracion.
E cartera ta carga responsabilidadnan cu ta toca bida diario di ciudadano, incluyendo infrastructura y telecomunicacion. E cambio di mando tambe lo yega den un periodo cu e organisacion di Infra ta pasando door di un proceso di reorganisacion y mehoracion di su procesonan, bao encargo di Rene Herdé. E trabou ey ta enfoca riba eficiencia, structura di organisacion y calidad di servicio na ciudadano.
John Hart ta figura como Presidente di Parlamento
Un eventual paso di Sneek pa gabinete lo habri e puesto di Presidente di Parlamento. Den e escenario cu ta considera awor, e nomber di Jonathan “John” Hart ta circulando pa asumi e presidencia.
Hart ta miembro di fraccion di AVP den Parlamento. Su posibel escogencia lo forma parti di e cambionan cu e movecion di Sneek por ocasiona, pero ainda mester distingui entre un preferencia politico y e decision formal cu Parlamento lo mester tuma. E registro publico di composicion di parlamento ta identifica Sneek como presidente y Hart como parlamentario di AVP.
Asina, e deliberacion riba un minister nobo ta conecta directamente cu e pregunta ken lo dirigi e trabou parlamentario. E presidencia ta un funcion institucional cu responsabilidad pa conduci reunionnan, mantene ordo y guia e proceso parlamentario.
Ta mencionando Robert Candelaria pa Minister di Husticia
Paralelamente cu e discusion riba Infrastructura y Telecomunicacion, e nomber di Robert Candelaria ta zona como un di e opcionnan principal pa e cartera di Husticia, Integracion, Transporte Publico y Energia den e reorganisacion cu ta contempla.
Segun e informacion ricibi, e idea di Candelaria no ta conta cu sosten di tur miembro di fraccion. Parti di e parlamentarionan ta prefera cu un di nan mes haya e oportunidad pa asumi e funcion ministerial.
E diferencia di opinion ta indica cu e proceso di escogencia ainda tin puntonan pendiente. Mientras pa Infrastructura y Telecomunicacion ta parce cu un mayoria interno a inclina pa Sneek, e discusion rond di Husticia ta presenta un panorama menos uni.
Den e evaluacion di candidatonan, preparacion, experiencia y capacidad pa dirigi e cartera lo ta aspectonan importante. E informacion disponibel no ta duna base pa conclui cua parlamentario ta suficientemente prepara, of no, pa e funcion. Pa haci un evaluacion asina, mester considera e trayectoria y e competencianan di cada candidato individualmente, banda di nan votonan tambe!
Votonan personal ta duna contexto na e cuater nombernan
E cuater nombernan cu ta circulando pa tuma e funchin di Rene Herdé a participa den eleccion di 6 december 2024 riba lista di AVP. Stephany Sevinger a haya 1.347 voto; Jennifer Arends-Reyes, 507; Clifford Heyliger, 295; y Marlon Sneek, 234.
Den e grupo aki, Sevinger a haya e cantidad mas grandi di voto personal. E preferencia interno cu ta wordo reporta pa Sneek ta mustra, sinembargo, cu e evaluacion pa un funcion ministerial ta envolvi otro consideracionnan politico ademas di resultado electoral individual. Parce cu Stephany Sevinger mes ta na fabor pa Marlon Sneek asumi e funcion pa e dos añanan cu ta keda di gobernacion.
Y si Marlon Sneek sali di Parlamento?
Un eventual salida di Marlon Sneek for di Parlamento pa asumi un funcion ministerial ta pone e enfoke riba sucesion den lista di AVP. Jamilah Maritza de Mey, kende ta e siguiente candidato na turno, parce di no ta interesa pa acepta e asiento. Cu esey, tur wowo awo ta riba Pedro Angel “Junior” Croes, number 15 riba lista di AVP, kende a obtene 80 voto personal den eleccion di 6 december 2024. Si Sneek sali, Croes lo tin e oportunidad pa drenta Parlamento, si e acepta e nombracion y cumpli cu e rekisitonan formal.
Tocante Marlon Sneek
Alfred Marlon Sneek ta un politico di AVP cu experiencia den Parlamento. Desde 2013 el a ocupa e funcion di vice lider di fraccion, y na november 2016 el a sigui Rene Herdé como lider di fraccion di AVP. E cambio di e tempo ey a forma parti di un reparticion nobo di tareanan dentro di partido. Su trayectoria ta inclui tambe participacion den contacto y deliberacion interparlamentario cu Hulanda.
Na maart 2025, Sneek a bolbe Parlamento despues di un ausencia di cuater aña y a keda eligi como Presidente di Parlamento. Su nombracion como Presidente di Parlamento pa e resto di aña parlamentario 2024–2025 a keda formalisa mediante landsbesluit di 27 maart 2025. Posteriormente el a keda nombra pa e aña parlamentario 2026–2027 tambe.
Tocante AVP
Arubaanse Volkspartij, conoci na Papiamento como Partido di Pueblo Arubano, ta un partido politico funda na 1942 bao liderazgo di Henny Eman. E partido ta basa su identidad riba principionan cristian democrata y un vision social cristian. AVP tin un trayectoria largo den politica di Aruba y den e lucha pa un posicion autonomo di e isla. Den e historia di Gobierno di Aruba, e partido a traha den diferente gabinete y a asumi e funcion di minister-president na hopi ocasion.
