Parlamentario di FUTURO, Ruthlin Lindor, a lamenta e decision di Mike de Meza pa bira parlamentario independiente, despues di e desacuerdonan tocante aumento di salario minimo. Durante un entrevista despues di e reunion publico di Parlamento di diabierna anochi, cu a dura te pasa di marduga, Lindor a rechasa e acusacion cu FUTURO ta domina AVP y ta cambia e ideologia di e partido.
Segun Lindor, e mocion original di De Meza tabatin dos punto cu coalicion a considera necesario pa cambia. E aumento di salario minimo no mester tabata temporal, sino permanente, mientras cu e fecha di implementacion a cambia di prome di januari pa prome di maart 2027. Lindor a enfatisa cu nunca tabatin desacuerdo tocante necesidad pa aumenta salario minimo. Segun e parlamentario, Gobierno ta consciente cu hopi ciudadano ta biba bou di e nivel di existencia minimo y ta prepara medida complementario pa evita cu costo di bida subi drasticamente.
E parlamentario a indica cu e tin hopi respet p’e experiencia politico di De Meza y a dese’e exito den su futuro. Sinembargo, segun Lindor, e desacuerdo no tabata necesario pa resulta den su salida for di AVP. Lindor a confirma tambe cu e presupuesto supletorio aproba lo facilita diferente proyecto, incluyendo vivienda pa personanan di 55 aña y mas, mehoracion di caminda, scol y infrastructura publico.
Na final, Lindor a sigura cu coalicion ta stabiel y cu discusion interno ta parti di un proceso politico saludabel. El a enfatisa cu Gobierno ta sigui traha pa bienestar di pueblo y cu aumento di salario minimo lo drenta na vigor prome di maart 2027.
Pa mas detaye lesa TREMPAN.
