Parlamentario di AVP, John Hart, ta boga pa un supervision efectivo riba e cumplimento cu Landsverordening Algemeen Pensioen (LAP), pa garantisa cu trahadonan den sector priva por conta riba e pension pa cual nan a contribui durante nan añanan di trabou. Segun Hart, e proteccion cu e ley ta ofrece mester ta compaña pa control, ehecucion y consecuencia ora no ta cumpli cu e obligacionnan.
Hart a recorda cu e ley a wordo introduci na 2011, bou di Gabinete Mike Eman I, pa brinda trahadonan den sector priva mas siguridad financiero ora nan yega edad di pension. Sinembargo, e ta señala cu e falta di supervision efectivo ta pone e proposito di e ley na riesgo.
“Un trahado cu ta contribui tur luna mester por tin confiansa cu, ora e yega edad di pension, e lo ricibi loke e tin derecho riba dje. Un descuento riba payslip mester ta compaña pa e pago di premie y e acumulacion di pension corespondiente,” Hart a expresa.
Preocupacion treci dilanti pa SER
Segun e parlamentario, den un evaluacion di e ley na 2017, Conseho Economico Social (SER) a trece atencion riba e necesidad di organisa e supervision di LAP. Hart ta lamenta cu e asunto aki a sigui sin e debido solucion durante e añanan siguiente, durante periodonan di Gabinete Wever-Croes I y II.
P’esey, un di e prome mocionnan cu el a presenta den nomber di fraccion AVP tabata dirigi na urgi gobierno pa establece supervision riba e cumplimento cu LAP. Tambe el a dirigi preguntanan na Minister-President pa obtene claridad tocante e paso cu ta wordo tuma.
Hart a indica cu e tema a forma parti di e combersacionnan den Dialogo Social cu diferente instancia, companianan di seguro y representantenan di comercio. Segun informacion cu el a ricibi, tin desaroyonan positivo pa SVB asumi e funcion di supervision, compaña pa ahustenan den e ley cu lo mester wordo presenta na parlamento.
Consecuencia real pa trahadonan
Hart a subraya cu su preocupacion ta basa tambe riba combersacionnan cu trahadonan cu a presenta nan payslip y carta di seguro, buscando claridad tocante nan pension. E ta referi, entre otro, na personanan cu a traha diez of diescinco aña den housekeeping y otro funcionnan, pero cu na momento di prepara pa pension ta enfrenta incertidumbre tocante e entrada cu nan tabata spera.
“Nos ta papia di hende cu a traha duro y cu kier disfruta di un descanso mereci. Ora e pension cu nan tabata conta riba dje no ta disponibel, e perdida di entrada por ta inmediato y drastico. Hopi di e personanan aki tampoco tin e medio financiero pa contrata un abogado y enfrenta un compania grandi,” Hart a señala.
Segun e cifranan cu Hart a menciona, e cantidad di personanan cubri bou di LAP a crece di alrededor di 36 mil pa mas di 40 mil. Pa e parlamentario, esaki ta subraya e importancia di atende e asunto cu urgencia.
Responsabilidad comparti y cumplimento
Hart ta haci un yamada na doñonan di trabou pa verifica cu nan ta cumpli cu tur obligacion bou di LAP y pa corigi cualkier incumplimento sin mas tardansa.
Segun su comprondemento di e ahustenan den preparacion, e marco legal lo contempla multa pa incumplimento. E ta considera esencial cu e autoridad encarga cu supervision tin e instrumento y capacidad necesario pa actua.
“Responsabilidad comparti ta nifica cu gobierno ta percura pa control efectivo, e doño di trabou ta cumpli cu su deber y e trahado ta aporta su contribucion. No ta aceptabel pa un hende yega edad di pension y descubri cu e premienan desconta di su salario no a yega na nan destino,” Hart a enfatisa.
E parlamentario a agrega cu e necesidad di ehecucion y control ta conta pa diferente area di gobernacion. Ora un ley ta existi sin supervision efectivo, su credibilidad y e proteccion cu e mester ofrece ta wordo debilita.
Hart ta spera cu e proposicion di ahuste di LAP por yega Parlamento pronto y cu su tratamento por wordo conclui ainda den 2026.
“Como parlamentario, nos tin e responsabilidad di controla gobierno y tambe di legisla. Nos mester percura cu e leynan cu nos pais ta necesita ta wordo trata y cu e derechonan cu nan ta establece ta wordo proteha den practica. Nos trahadonan no por sigui warda pa e siguridad cu nan a traha pa dje”, Hart a conclui.
