Un app nobo desaroya pa Aruba ta duna consumidor mas informacion, mas opcion y mas control riba nan gastonan di supermercado.
Bo sa na unda e productonan cu bo ta cumpra tur siman ta mas barata? Cu e pregunta aki, Unda ta introduci un manera nobo y inteligente pa consumidor na Aruba haci nan compras. Unda ta un aplicacion nobo cu ta permiti usuarionan scan un producto cu nan telefon y compara e ultimo prijsnan conoci di e mesun producto na diferente supermercado na Aruba.
Den un temporada cu costo di bida ta un preocupacion importante pa hopi famia, Unda ta introduci un herment practico cu ta pone informacion di prijs directamente den man di consumidor. E idea ta simpel: prome cu bo cumpra, bo por check na unda e producto ta registra pa un prijs mas abou.
Cada siman, miles di consumidor ta haci compras na supermercado, pero hopi biaha sin sa si e productonan cu nan ta cumpra ta disponibel pa un prijs mas abou na otro establecimento. Pa compara prijs, normalmente bo mester bishita diferente supermercado, wak oferta of depende di informacion cu bo a haya di otro persona.
Unda kier cambia esaki.
Cu e aplicacion, consumidor por scan e barcode di un producto of busca e producto directamente den e app. Den algun seconde, Unda ta mustra e ultimo prijsnan registra pa e producto na diferente supermercado, permitiendo e usuario compara y haci un decision mas informa.
“Nos tur ta haci compras y nos tur kier uza nos placa di e manera mas inteligente posibel. Pero con bo por sa na unda un producto ta mas barata si bo no tin e informacion? Cu Unda nos kier cambia esaki. Nos kier haci comparacion di prijs algo simpel, accesibel y practico pa tur hende na Aruba,” e ekipo tras di Unda ta splica.
Un producto por ta mas barata na un supermercado, mientras otro producto ta mas barata na otro. Esey ta precisamente unda Unda por haci diferencia. Un supermercado por tin un bon prijs pa lechi, mientras otro por ta mas barata pa aros, koffie of azeta. Cu Unda, consumidor por compara e productonan cu nan ta cumpra regularmente, en bes di asumi cu un solo supermercado semper tin e prijs mas barata. Tambe por añadi productonan na bo “ Shopping list”, y wak na cua supermercado bo “ Shopping list” completo lo costa menos.
E diferencia di prijs di un solo producto kisas por parce chikito, pero ora bo ta cumpra varios producto tur siman, e posibilidad pa haci decisionnan mas inteligente por bira importante pa bo presupuesto familiar.
Un app cu comunidad di Aruba mes ta yuda construi
Unda no ta solamente un aplicacion pa consulta prijs. E ta tambe un plataforma cu ta invita comunidad pa participa activamente den mantene e informacion di prijsnan mas completo y actualisa.
Usuarionan por yuda agrega productonan cu ainda no ta den e sistema, registra prijsnan nobo y verifica of actualisa prijsnan existente. Di e manera aki, cada contribucion ta yuda haci Unda mas util pa tur otro consumidor.
“E forsa di Unda ta den participacion di comunidad. Imagina bo cu miles di hende na Aruba ta yuda registra y actualisa prijsnan di e productonan cu nan ta cumpra. Cada contribucion ta yuda otro persona haci un decision mas informa. Nos kier crea un comunidad cu ta yuda otro, cu cada scan,” e ekipo tras di Unda ta agrega.
Como cu prijsnan den supermercado por cambia, Unda ta presenta e ultimo informacion conoci y no ta garantisa cu e prijs registra ta mescos cu e prijs actual na momento di compra. P’esey, participacion di usuarionan y actualisacion continuo ta un parti esencial di e desaroyo di e plataforma.
Mas transparencia, mas informacion y mas posibilidad pa scoge
Unda su obhetivo no ta pa pone supermercadonan contra otro, sino pa contribui na un mercado unda informacion di prijs ta mas accesibel pa e consumidor. E iniciativa ta mira cooperacion cu supermercadonan como un oportunidad importante pa amplia e cantidad di productonan disponibel y mehora e calidad di informacion.
Alabes, Unda ta un ehempel di con tecnologia y innovacion local por ofrece solucionnan practico pa necesidadnan di cada dia pa e comunidad di Aruba.
E ambicion ta pa Unda sigui crece, amplia su cobertura di supermercado, agrega mas producto y bira un herment cu consumidor por consulta regularmente prome cu nan haci compras.
Aruba:Ta tempo pa cuminsa scan!
Cu e lansamento di Unda, e ekipo ta invita tur consumidor na Aruba pa download e aplicacion, explora su funcionnan y haci nan prome comparacion di prijs.
Scan bo lechi, bo aros, bo koffie, bo azeta of cualkier otro producto cu bo ta cumpra regularmente. Mira e prijsnan disponibel, compara e diferente supermercadonan y descubri unda bo por haya e producto pa un prijs mas abou segun e informacion registra.
Y si bo mira cu un prijs a cambia, yuda actualisa e informacion. Asina bo no ta solamente yudando bo mes, sino tambe otro famianan na Aruba.
“Nos kier pa Unda bira un parti natural di e manera cu hende na Aruba ta haci compras. Mescos cu bo ta check bo lista di compras prome cu bo sali di cas, nos kier pa bo custumbra check Unda. Pasobra un consumidor cu tin mas informacion, tin e posibilidad pa haci bon decision di compra,” e ekipo ta conclui.
Download Unda awe riba www.unda.cheap y descubri na unda bo compras por ta mas barata.
