“Nos Baranca, Nos Democracia” ta reuni dialogo, arte y cultura
Kico 40 aña di Status Aparte y democracia Arubano ta nifica pa bo? Y con bo kier pa e proximo 40 añanan di nos democracia ta? E preguntanan aki ta forma e punto di salida pa “Nos Baranca, Nos Democracia”, un encuentro organisa pa Universidad di Aruba cu lo tuma luga diahuebs, 12 di november 2026, di 6:00 pa 9:00 di anochi na Casibari Rock Formation. Entrada ta gratis y henter comunidad ta bonbini.
E actividad ta ofrece un espacio pa ciudadano, organisacionnan social, studiante y famia intercambia idea y experiencia tocante democracia, representacion y e manera con decisionnan ta wordo tuma y ehecuta na Aruba. E pregunta central ta si loke realmente ta conta pa e pueblo Arubano ta wordo realisa den e proceso democratico.
Dialogo den un ambiente habri
Rondona pa e barancanan di Casibari, e encuentro lo conta cu un area principal y varios espacio mas chikito pa combersacion. Participantenan por move libremente entre e diferente dialogonan, scucha otro perspectiva y comparti nan propio reflexion.
E formato ta invita un intercambio entre mundo academico y comunidad, den cual experiencia personal y conocemento ta contribui na e combersacion tocante e rumbo di Aruba.
Entre e temanan cu lo aborda tin representacion democratico, resiliencia di e pueblo Arubano y e pasado y futuro di 40 aña di Status Aparte. E programa tambe ta inclui e contribucion titula “Step out of your Conch”.
Arte y cultura como parti di e combersacion
Ademas di e intercambionan, e anochi lo conta cu arte y cultura local, poesia, spoken word y teatro. E expresionnan aki ta forma parti di un programa cu ta invita participantenan pa reflexiona riba nos democracia for di diferente perspectiva.
E encuentro ta brinda oportunidad pa mira bek riba e caminda cu Aruba a cana, mientras cu comunidad ta comparti su ideanan y aspiracionnan pa e añanan cu ta bin.
Aporte di comunidad lo sigui den intercambio academico
E aportenan di publico cu wordo colecta durante e encuentro lo wordo inclui den e discusion di un proximo evento academico. Asina, e combersacionnan na Casibari lo contribui tambe na e intercambio cu lo sigui despues di e actividad.
Universidad di Aruba ta invita henter comunidad pa participa, scucha y comparti. Tur hende tin un perspectiva pa aporta na e combersacion tocante nos baranca y nos democracia.
