“E crisis politico, economico y humanitario di e pais bisiña Venezuela, ta sigui ta sumamente preocupante,” segun e presupuesto estatal di Relacion Exterior di Reino Hulandes ta bisa p’e proximo aña riba e pais di e presidente Nicolas Maduro. E punto di salida p’e Ministerio na Den Haag ta promove e regreso na un Venezuela stabiel, constitucional y democratico,” segun varios nota den e presupuesto.
E relacionnan exterior ta un asunto di Reino di Hulanda: Hulanda na Europa y Caribe, como tambe e entidadnan publico Boneiro, Sint Eustatius y Saba, como e paisnan autonomo Aruba, Corsou y Sint Maarten. E Ministerio di Relacion Exterior ta, por lo tanto, un ministerio di Reino y e minister ta un minister di Reino. Esaki ta nifica cu no solamente e mester representa e interesnan di Hulanda, sino tambe e partinan Caribense di Reino.
“Por lo tanto, ta compromiso di e Ministerio di Relacion Exterior, incluyendo e red di mision, integra e interesnan di tur e partinan di Reino den e campo di relacion exterior di e manera mas optimo posibel den e maneho exterior mas amplio di Reino,” segun e capitulo di e informe estableci di e presupuesto di gobierno pa 2023 y publica e siman aki den Antiliaans Dagblad.
“Den Reino ta otorga gran importancia e bon lasonan cu Latino America y Caribe (tambe conoci como e region LAC). Un region cu ta alinea den hopi aspecto cu Reino y Union Europeo, manera cu e condena amplio di e guera Ruso na Ucrania ta demostra.” E afinidad aki ta haci cu Reino y Union Europeo ta “socio natural”, e presupuesto di Asunto Exterior ta continua. “Ainda mas den un periodo di cambio di panel geopolitico y e (creciente) influencia di China y Rusia.” Pa e relato completo lesa TREMPAN
