Den un reconocemento notabel di su influencia global, Rosen College of Hospitality Management a destaca durante e Asamblea General di Nacionnan Uni (UN). Invita personalmente p’e presidente di e Asamblea General, Profesor di Economia y Maneho di Turismo, e Rubiano, Robertico Croes, a participa den e evento tematico di nivel halto riba turismo.
“Hopi poco hende ta ricibi un carta personal di e presidente di e Asamblea General pa papia na UN y mi ta sinti mi honra di ta un di nan,” asina Tico Croes a comenta. Su experticio ta “Tourism Economics”, desaroyo humano, pobresa y maneho di turismo cu un interes special riba economianan den desaroyo.
Den e ultimo 20 añanan, Rosen College of Hospitality Management a crece significativamente den nan capacidad di investigacion, estableciendo como un lider global den estudio di hospitalidad y turismo. E crecemento aki ta refleha den e contribucionnan extenso di e universidad n’e investigacion, colaboracion internacional y su impacto riba maneho turistico global. E reputacion di Rosen College a hay’e reforsa pa su revista, Rosen Research Review, di cual Tico Croes t’e editor y cu ta yega na mas di 150 pais cu mas di 1 miyon lector.
“E reconocemento global aki di Rosen College ta un testimonio di e conocemento colectivo y e capacidad di investigacion cu nos a desaroya,” asina Tico Croes a bisa.
Avansando den sostenibilidad global a traves di turismo
E evento di Nacionnan Uni a inclui un charla riba e futuro di turismo. Durante e combersacion, Tico Croes a discuti e relacion entre turismo, sostenibilidad y e 17 obhetivonan di desaroyo sostenibel (SDG) di UN, cu ta busca pa caba cu pobresa, proteha e planeta y garantisa e prosperidad pa tur. El a subraya cu e evento aki tabata di e poco biahanan den varios decada cu UN a pone tanto enfasis riba turismo, specialmente a base di e pandemia di COVID-19. “COVID-19 a aumenta pobresa y a resalta e desigualdadnan den atencion medico, particularmente den e paisnan den desaroyo,” Tico Croes a bisa. “Atende e problemanan aki den e contexto di sostenibilidad y SDG ta crucial.”
Siman Nacional di Biahe y Turismo
Durante e Siman Nacional di Biahe y Turismo di e aña aki, cu a tuma luga dia 19 pa dia 25 di mei, e ideanan di Tico Croes ta resona ainda mas. E celebracion anual aki, estableci na aña 1983, ta destaca e papel esencial di biahe den stimula e crecemento economico, cultiva comunidad vibrante y enrikece bida. E tema di e aña aki ta subraya con biahe y turismo ta vital p’e economa di nos nacion y e bienestar di su ciudadanonan.
Rubiano riba un podium mundial
Durante e presentacion, Tico Croes a enfatisa con un maneho reflexivo di turismo y e sostenibilidad por mehora bida. “Pa mi e tabata particularmente emotivo pasobra mi tabatin e oportunidad pa ta riba e podium caminda e hefenan di estado ta papia y comparti nos investigacion riba e futuro di turismo global, e papel di sostenibilidad y e bienestar, manera e dosnan aki ta link cu otro y con turismo por ta un vehiculo crucial pa yuda e personanan mehora nan calidad di bida.”
Balans entre medio ambiente y desaroyo
Tico Croes a comparti un ehempel interesante di Hulanda. “Si e Hulandesnan a considera sostenibilidad ambiental den e decada di 1950, e partinan significativo di e pais lo ta bao awa awendia,” el a bisa. “Nan creatividad den construccion di dijk a recupera tera y a pusha e limitenan di lo posibel.” El a enfatisa cu enfoca demasiado den preocupacion ambiental, por limita e creatividad humano y e solucionnan cu ta beneficia tanto e personanan como nos planeta.
“Nos mester fomenta e creatividad y proporciona oportunidad pa solucion innovador cu ta beneficia tur,” el a bisa. Tico Croes tambe a destaca cu e residentenan di e destinonan turistico mester dicidi con turismo ta afecta nan. “No ta coresponde n’e academiconan dicta. Nos por delinea principio, pero hende mester por dicidi kico loke ta miho pa nan bienestar,” el a bisa. E aproximacion democratico aki, el a argumenta, ta crucial pa fomenta e creatividad y sigura cu turismo ta beneficia tur hende.
For di diplomacia pa academia
E reciente presentacion di Tico Croes na UN no ta su prome bishita n’e Asamblea General. Na principio di aña 80, a bishita e Asamblea General di UN tempo cu e tabata traha como diplomatico den e departamento di Relacion Exterior di Antia Hulandes. El a sinta den e delegacion di Reino Hulandes, scuchando e hefenan di estado discuti e retonan global y peticion di apoyo internacional. “Tabata un momento formativo di mi carera,” Tico Croes a indica.
Despues di cuminsa su carera den diplomacia, Tico Croes a haci e transicion p’e academia, caminda cu el a converti den un bos lider den economia y maneho di turismo. Su experiencia ta bay riba economia di turismo, desaroyo humano, reduccion di pobresa y maneho di turismo, particularmente den economia chikito y den desaroyo.
Autor di buki
Tico Croes a haci contribucion significativo riba veld, skirbiendo seis buki, incluyendo “Small Island and Small Destination Tourism” y “A Modern Guide to Tourism Economics” y publicando mas di shen obra. Notablemente, e tabata co-autor di un informe cu otro profesor di Rosen College a presenta durante e conferencia riba Ocean di Nacionnan Uni na 2022. El a lidera e proyecto di Malesa Infeccioso y Salud durante Biahe na UCF, financia pa un subsidio universitario di 4.5 miyon dollar.
Na Rosen College, Tico Croes ta un defensor firme di integra perspectiva mas amplio riba educacion turistico. E ta kere cu e futuro lidernan mester enfoca no solamente riba ganashi, sino tambe den crea oportunidad pa individuo y comunidad. “Nos investigacion mester yuda fomenta e creatividad y proporciona oportunidad pa otro, sigurando un vision holistico di e recursonan mas leu di e rikesa material,” el a bisa.
Tico Croes: Di diplomatico pa defensor
Tico Croes ta imagina un programa cu ta inclui experiencia di e organisacionnan no gubernamental, corporacion, politico y lider religioso, preparando e studiantenan pa lidera cu un comprension completo di su impacto den sociedad. “E decisionnan di un lider por tin consecuencia di gran alcance, afectando famia, comunidad y hasta economia nacional,” el a bisa. “No ta trata di detaye chikito administrativo, ta trata di impacta den sociedad. Nos mester enfoca riba loke ta relevante, impactante y util”. Mientras cu e Siman Nacional di Biahe y Turismo a yega su fin, e biahe di Tico Croes di diplomatico pa defensor, ta sirbi como un recordatorio oportuno di e potencial pa impulsa cambio positivo.
Investigacion cientifico pa determina maneho
Reflexionando riba e papel di Rosen College te n’e discusionnan global, Tico Croes a conclui: “E conocemento colectivo na Rosen College ta lanta como un faro riba e escenario global. Nos compromiso cu e investigacion y e educacion den turismo no solamente ta impulsa e excelencia academico, sino cu tambe ta contribui significativamente n’e maneho internacional y n’e bienestar di comunidad”. E perspectivanan di Tico Croes, ta ofrece un vision convincente p’e futuro di turismo, un cu ta resona hopi mas leu di e murayanan di Nacionnan Uni.
Tocante dr. Tico Croes
Robertico “Tico” Croes a ricibi su doctorado na e Universidad di Twente, na Hulanda. Su tesis a enfoca riba modelisacion cuantitativo di e demanda turistico, desaroyo di turismo y intervencion gubernamental. Den su carera anterior, e tabata Minister di Asunto Economico, Turismo y Finansa di Aruba. E tabata miembro di Parlamento di Aruba y director di Departamento di Asunto Exterior di Aruba. E tabata Secretario General di Organisacion Democratico Cristian pa Americas y miembro di parlamento Latino Americano (Parlatino).
Dr. Robertico Croes ta editor di Rosen Research Review y profesor na Rosen College of Hospitality Management. E ta autor di cinco buki, a publica mas di 100 obra, a colabora den mas di 20 buki y a emiti mas di 30 rapport di e sector. Su buki mas recien ta titula “Small Island and Small Destination Tourism. E ta un autoridad internacionalmente reconoci den economia y maneho di turismo, enfoca riba e desaroyo humano den economia restringi.
Dr. Tico Croes tin mas di 40 aña di experiencia den turismo y asunto exterior. E ta considerando seriamente pa muda y pa pronto bin biba bek na Aruba.
