Parlamentario Benny Sevinger (AVP) ta bisa cu riba e tema di sushedad di nos pais, nos DUMP y RWZI, na comienso di Gabinete Wever Croes I, a informa Otmar Oduber cu si kier resolve e problemanan ey lo tin cu sigui cu loke AVP a laga atras. E tambe tabata forma parti di e gobierno ey un tempo anto sa cuanto rapport y estudio a haci pa yega na solucion di Dump. Den un parti por a bisa cu a sigui cu ne pasobra ta mira consehonan di e comision di desperdicio, ta sigui un parti di dje, pero probablemente pa por ‘fix’ su campañadonan no a cumpli cu ne segun Sevinger.
Despues cu Otmar Oduber a baha, Marisol Tromp a tuma over e cartera y despues Evelyn Wever-Croes y ningun di dos a logra bin cu nada p’e problema di Serlimar, al contrario haci esaki pio. Awor ta bini Ursell Arends cu supuestamente ta e salbador, cu lo resolve e problema di sushi na Aruba. “Mi a bis’e akiden, for di e prome dia cu Arends a drenta. El a bisa cu lo bin Trash to Cash, mi a bis’e pa bin cu un ‘tekenwedstrijd’ no ta bay resolve problema di sushi.”
Sevinger a bisa cu Arends a pone gran cantidad di hende hunto pa trece idea riba con ta resolve problema di sushi. Hasta mi a dun’e compliment riba dos mucha di scol cu a trece un idea con pa resolve problema di sushi. A papia di recicla palet, pero ta imposibel cu un par di mucha di scol of hende cu ta traha cu palet por resolve problema di sushi.
Tin estudionan haci. Loke tin cu haci ta repasa e estudionan haci caba anto tuma decisionnan serio y pone placa tras di e decisionnan aki. “Esey e no kier haci, y awe nos ta mira consecuencia di tur e maneho aki di Trash To Cash, kico pueblo a wak di beneficio. Gasto di Serlimar ta sigui subi, consecuentemente Serlimar mester a cobra en bes di 25 florin, awor ta pasa 40 florin caba pa bari.” Temponan aya pensionado no mester a paga pero awor nan hasta mester paga dobel. Tambe antes pueblo por a hiba sushi na dump, awe mester mira cuanto sushi ta rond pais Aruba pasobra mester paga un cantidad di placa pa tira sushi na Ser’i Teishi pa verwerk e.
Na comienso, Sevinger a taha minister Arends cu cera dump ta e cos di mas facil cu tin, e ta e cos di mas ridiculo tambe. Pasobra despues cu bo cera esaki bo tin cu puntra bo mes si bo a soluciona e problema. Awe Sevinger ta bisa di haya rason cu no a soluciona e problema pasobra bo por a wel di cera dump pa pueblo, pero keto bay tin sushedad medico, keto bay tambe tin desperdicio peligroso, y mas, dus a cera e dump pa show. “Pero ketobay e dump aki ta habri.”
